Gjatë ditës së sotme, studentët e Universitetit të Prishtinës “Hasan Prishtina”, kanë mbajtur protestë kundër krijimit të Asociacionit të Komunave me Shumicë Serbe në Kosovë.
Njëri nga organizatorët e kësaj proteste, Bleron Beka në “Politiko” ka mohuar raportimet mediatike, se protesta ishte e lidhur me partinë politikë në pushtet, duke treguar se për t’iu bashkangjitur kauzës së tyre ftesa kanë pranuar të gjitha partitë dhe jo vetëm partia në pushtet.
“Parlamenti studentor ka qenë organizatori dhe nuk ka të bëj me organizim të njëra apo tjetrës parti. Përkundrazi që ta saktësojmë këtë temë, një email drejtuar të gjitha partive politike është nisur nga Parlamenti Studentor ku i kemi ftuar të gjitha partitë politike që ta kundërshtojnë Asociacionin, shoqata të ndryshme, anëtarë të shoqërisë civile, organizata etj. Unë mendoj se individët nuk e përfaqësojnë një parti, janë qytetarë dhe kanë bërë mirë që na janë bashkuar, përndryshe s’ka pasur organizim nga asnjë parti politike që të na bashkohen, ata janë bashkuar në mënyrë individuale”, ka thënë Beka.
Tutje, Beka ka thënë se në protestë ishin rreth 3000 persona dhe pjesëmarrja ka qenë e mjaftueshme, duke theksuar se Parlamenti Studentor do të bëjë aktivitete të ndryshme për ta kundërshtuar Asociacionin.
