Gazetarja dhe autorja shqiptare, Mira Kazhani, ka bërë një rrëfim mjaft personal gjatë emisionit “Goca dhe Gra”, ku ka folur hapur për dëshirën e saj për t’u bërë nënë dhe ëndrrën që nuk arriti ta realizonte.
Gjatë bisedës në studio, Kazhani tregoi se, po të kishte mundësinë të kthehej pas në kohë, do të zgjidhte ngrirjen e vezëve, si një mundësi për të ruajtur alternativat për t’u bërë nënë në të ardhmen.
Ajo u shpreh se kjo procedurë është një mundësi që gratë duhet ta marrin në konsideratë, veçanërisht nëse dëshirojnë ta shtyjnë vendimin për të pasur fëmijë.
“Është mirë që t’i ngrijmë vezët. Le të jetë aty. Tani, të them të drejtën, unë në libër i kam rrëfyer të gjitha”, deklaroi Kazhani.
Në të njëjtën bisedë, moderatorja Ori Nebiaj zbuloi se e ka kryer tashmë këtë procedurë, duke treguar se ka menduar për mundësinë e shtyrjes së amësisë.
“I kam marrë masat”, tha Nebiaj.
Rrëfimi i Kazhanit nxiti diskutimin për dëshirën për t’u bërë prind, sfidat që mund të përjetojnë gratë në këtë rrugëtim dhe mundësitë që ofron mjekësia moderne për ruajtjen e fertilitetit.
