Presidentja e Kosovës, Vjosa Osmani ka pritur dje në takim ambasadori e Gjermanisë, Jorn Rohde.
Presidenca e Republikës së Kosovës ka dhënë detaje nga ky takim, ku kanë theksuar se u diskutua për pjesëmarrjen e Kosovës në COP28.
Gjithashtu në këtë takim, Rohde ka shprehur gatishmërinë e Gjermanisë për mbështetjen e Kosovës në arritjen e objektivave që kontribuojnë në adresimin e sfidave klimatike në vend.
“Presidentja Vjosa Osmani ka pritur sot në takim ambasadorin e Republikës Federale të Gjermanisë në Kosovë, Jörn Rohde. Në takim u diskutua për pjesëmarrjen e Kosovës në COP28, konferencën kryesore globale për ndryshimet klimatike, si dhe hapat tutje pas kësaj pjesëmarrjeje historike të Republikës së Kosovës në nivel të kreut të shtetit. Në këtë frymë, ambasadori Rohde shprehu gatishmërinë e Gjermanisë për të vazhduar mbështetjen për Kosovën në arritjen e objektivave që kontribuojnë në adresimin e sfidave klimatike në vend.” – thuhet në njoftim.
Ndër të tjera, në takim u fol edhe për zhvillimet e fundit në vend dhe u diskutuan mundësitë e thellimit tutje të bashkëpunimit Kosovë-Gjermani.
