Organizata e Veteranëve të Luftës së UÇK-së ka zhvilluar një takim urgjent, ku sipas tyre është diskutuar për “përkeqësimin e klimës së sigurisë” pas angazhimit të njësive speciale në një incident që e cilësuan si “zënkë të zakonshme e pa pasoja të rënda”.
Në reagimin e tyre, OVL-UÇK theksoi se strukturat e sigurisë së Kosovës ekzistojnë për të mbrojtur qytetarët dhe rendin kushtetues, e jo për të marrë pjesë në “shtetrrethime dhe ngjallje frike”.
Ata iu drejtuan edhe pjesëtarëve të Policisë së Kosovës me thirrjen që të mos harrojnë se mandati i tyre buron nga Kushtetuta dhe ligjet e vendit, e jo nga, siç u shprehën, “urdhrat qeveritare në dobi të zbatimit të skenarëve të porositur nga Albin Kurti dhe banda e tij”.
Të jemi të qartë. Strukturat e sigurisë së Republikës ekzistojnë për të mbrojtur qytetarët dhe rendin kushtetues, e jo të marrin pjesë në shtetrrethime e ngjallje të frikës. Me këtë rast u drejtohemi pjesëtarëve të Policisë të mos harrojnë se mandati i tyre buron nga Kushtetuta dhe ligjet, e jo nga urdhrat qeveritare në dobi të zbatimit të skenarëve të porositur nga Albini Kurti dhe banda e tij”, thuhet në komunikatë.
Sipas OVL-UÇK-së, nëse uniforma e Kosovës shndërrohet në instrument për vendosjen e “tiranisë së regjimit”, atëherë përgjegjësia nuk mbetet vetëm te urdhërdhënësit, por bëhet edhe personale.
Organizata deklaroi po ashtu se, “në mbrojtje të lirisë, demokracisë dhe rendit kushtetues”, do të pengojë “me çdo mjet” çdo individ apo organizim politik që tenton të vendosë diktaturën.
Në komunikatë u theksua se “diktatura mori fund në qershor të vitit 1999”, ndërsa u shtua se veteranët janë të gatshëm të sakrifikohen gjithmonë në mbrojtje të lirisë dhe shtetit.
“Kushdo që tenton ta vë këtë realitet në provë, le të urdhërojë. Këtu jemi. Të gatshëm gjithmonë të sakrifikohemi në mbrojtje të lirisë dhe shtetit që ka në themele mundin e luftëtarëve e gjakun e Dëshmorëve të UÇK-së”, përfundon reagimi i OVL-UÇKsë.
https://www.facebook.com/share/p/1bn6vUGoyf/?mibextid=wwXIfr
