Një 25-vjeçar shqiptar është ndaluar në aeroportin e Memmingenit dhe është përjashtuar nga hyrja në Gjermani, pasi autoritetet dyshuan se kishte udhëtuar për të punuar, ndonëse kishte deklaruar se qëllimi i vizitës ishte turistik.
Për pasojë, atij i është vendosur edhe ndalim hyrjeje dhe qëndrimi në të gjithë Zonën Schengen për dy vite.
I riu kishte mbërritur në Gjermani të enjten, me një fluturim nga Tirana.
Gjatë kontrollit kufitar, ai deklaroi se po udhëtonte për turizëm, ndërsa për të mbështetur këtë deklaratë paraqiti edhe një biletë kthimi.
Dyshimet e autoriteteve u shtuan gjatë kontrollit të bagazhit të dorës, ku u gjetën pajisje pune, çka ngriti dyshime se qëllimi i vërtetë i udhëtimit ishte punësimi në Gjermani shkruajnë mediat gjermane.
Verifikimet e mëtejshme zbuluan se bileta e kthimit ishte anuluar përpara mbërritjes së 25-vjeçarit në Memmingen.
Në bazë të këtyre rrethanave, autoritetet gjermane vlerësuan se deklarata për një udhëtim turistik nuk përputhej me qëllimin e tij real të udhëtimit, transmeton Klankosova.tv.
