Analistja politike, Shqipe Pantina, thotë se bazuar në deklaratat e liderëve të partive ish opozitare nuk pritet që të ketë një qeveri të re.
Pantina në një prononcim për GazetaBlic, thotë se me numrin aktual të votave që Lëvizja Vetëvendosje ka në Kuvend, edhe nëse merr mbështetjen e të gjithë deputetëve të minoriteteve jo serbe, nuk do t’i ketë votat e mjaftueshme për ta udhëhequr qeverinë.
“Bazuar në deklaratat e liderëve të partive ish-opozitare : PDK, LDK, AAK dhe Nisma, nuk pritet të ketë qeveri të re. Nga ana tjetër, edhe Konjufca ka deklaruar se nuk do të përpiqet të lidhë koalicion me ndonjë parti tjetër. Po ashtu, me numrin aktual të votave që ka VV-ja në Kuvend, edhe nëse merr mbështetjen e të gjithë deputetëve të minoriteteve jo-serbe, nuk i ka votat e mjaftueshme për të marrë besimin dhe për të udhëhequr qeverinë”, tha ajo.
Ndër të tjera, ajo thekson se në këto rrethana opsioni i vetëm mbeten zgjedhjet, të cilat sipas saj do të sjellin ndryshim në përbërjen e Kuvendit ose do t’i detyrojnë partitë të zbusin qëndrimet dhe të ulen e të bashkëpunojnë për krijimin e institucioneve.
“Në këto rrethana, opsioni i vetëm mbeten zgjedhjet, të cilat ose do të sjellin ndryshim në përbërjen e Kuvendit, ose do t’i detyrojnë partitë të zbusin qëndrimet dhe të ulen për të bashkëpunuar në krijimin e institucioneve. Sido që të jetë, përsëritja e një situate të ngjashme me atë pas zgjedhjeve të 9 shkurtit nuk duhet lejuar, sepse mund të jetë fatale për vendin”, përfundoi Pantina, për GazetaBlic.
