Zëdhënësi i Qeverisë në detyrë, Perparim Kryeziu, ka reaguar lidhur me paraqitjen e kryeministrit Albin Kurti në Gjykatë për rastin e kanosjes ndaj tij.
Pas kritikave nga PDK dhe LDK-ja, Kryeziu ka thënë se pjesëmarrja e kryeministrit në këtë seancë nuk përbën asnjë standard të dyfishtë në raport me ftesën nga Prokuroria Speciale.
“Paraqitja e kryeministrit Kurti në Gjykatë për rastin e kanosjes ndaj tij nuk është kurrfarë standardi i dyfishtë në raport me ftesën nga Prokuroria Speciale.
Sa i përket ftesës së Prokurorisë Speciale, kryeministri Kurti asnjëherë nuk ka refuzuar që të japë dëshminë e tij. Përkundrazi, ai ka shprehur gatishmërinë e plotë për të bashkëpunuar me drejtësinë dhe për të respektuar parimin e transparencës dhe llogaridhënies, duke kërkuar që intervistimi të zhvillohet në zyrën e tij, një praktikë kjo që ka ndodhur edhe më parë.
Ndërkaq në lidhje me rastin e kanosjes, zyrtarët hetues të autorizuar nga Prokuroria e kanë intervistuar kryeministrin Kurti pikërisht në zyrën e tij më 10 qershor 2025. Sot ai u paraqit në gjykatë si palë e dëmtuar”, ka shkruar Kryeziu në Facebook.
