Nesër në Bruksel përfaqësuesi special i BE-së për dialogun Kosovë-Serbi, Miroslav Lajçak, do t’i takojë Besnik Bislimin dhe Petar Petkoviç në Bruksel.
“Kosova dhe Serbia: Nesër Përfaqësuesi Special Miroslav Lajçak do të pres kryenegociatorët e të dyja palëve në kontekstin e dialogut të ndërmjetësuar në Bruksel”, ka njoftuar zëdhënësi i BE-së, Peter Stano në Twitter.
Ai ka shtuar se fokus do të jetë zbatimi i plotë i marrëveshjes së 27 shkurtit dhe hapat drejt depërshkallëzimit të situatës në veri të Kosovës.
Në anën tjetër, kryeministri i Kosovës, Albin Kurti, ka thënë se Kosova ka ndërmarrë hapat e parë për deeskalim të situatës në veri, duke reduktuar numrin e pjesëtarëve të Policisë së Kosovës në tri ndërtesat e komunave veriore.
Ai ka shtuar se tash qeveria po fillon të hapë rrugë për zgjedhje të parakohshme.
“Kosova tashmë po zbaton me mirëbesim marrëveshjen me Bashkimin Evropian dhe të dërguarin special për shtensionimin e arritur në Bratislavë”, ka thënë Kurti.
Lidhur me pritjet nga takimi i nesërm e hapat e Kosovës për deeskalim, derisa nga BE ende nuk janë hequr masat ndaj Kosovës, për Gazeta Blic kanë folur nga PDK dhe LDK.
Deputetja e LDK-së, Rrezarta Krasniqi, përmend takimin e Kurtit me Lajçak në Greqi, që thotë se takimet për dialog për fatin e Kosovës nuk duhet të fliten në bregdet apo skutave pro në Bruksel, teksa shton se nga një takim i tillë nuk mund të ketë pritje pozitive për vendin.
“E para që është më e rëndësishmja, takimet për të cilat flitet për fatin e Kosovës në kuadër të dialogut nuk do duhej të zhvillohen në resorte bregdetare apo skutave, por atje ku e kanë vendin në Bruksel, dhe e dyta nga një takim i tillë nuk mund të ndërtohen pritje për diçka pozitive për vendin, sepse zor që do t’i bie ndërmend interesi i vendit nga bregdeti grek”, shprehet ajo për Gazeta Blic.
Krasniqi vlerëson se qytetarët duhet ta kenë të qartë se hapat për të cilët Qeveria është pajtuar me BE-në nënkuptojnë zmbrapsje nga qasja e saj e dëmshme, por që dëmi është bërë dhe është humbur kohë dhe është përkeqësuar pozicioni i Kosovës karshi aleatëve tanë.
“Duhet ta bëjmë të qartë për qytetarët, pikat për të cilat tashmë janë dakorduar me Bashkimin Evropian, nënkuptojnë zmbrapsjen e kësaj qeverie nga qasja e gabuar dhe e dëmshme për vendin, e cila ka prodhuar pasoja dhe sanksione të mëdha. Pra, kemi të bëjmë me pranimin e fajit, me shumë vonesë, dhe tek pasi që është shkaktuar dëmi. Kjo ka shkaktuar humbje kohe dhe përkeqësim të pozicionit tonë si vend, krashi aleatëve tanë, SHBA-në dhe BE-në”, potencon deputetja e LDK-së.
Ajo shton se duhet pritur nëse katër hapat e marrëveshjes do të kenë efekt, teksa thekson se nëse veprimet do të kishin qenë të koordinuara me partnerët, nuk do të ishim në këtë gjendje.
“Tani, nëse marrëveshja katër pikësh do të ketë efekt në deeskalim të situatës, konsideroj se për këtë duhet të pritur, me qenë se edhe iplementimi i tyre do të jetë i ndarë në faza, por jam e sigurt se nuk do të ishim në këtë pikë, nëse veprimet do të kishin qenë të koordinuara me partnerët tanë qysh në fillim, për veprimet e ndërmarra në pjesën veriore të vendit”, deklaron Rrezarta Krasniqi për Gazeta Blic.
Ndërsa, deputetja e PDK-së, Ariana Musliu Shoshi, thotë për Gazeta Blic se në asnjërën nga pikat e marrëveshjes nuk dihet se çka do të ndodhë me bandat në veri dhe se Kurti na ka lodhur duke thënë se do ta luftojë krimin e bandat në very, ndërsa që nuk ka bërë asgjë e as nuk dihet se çka do të ndodhë pas verës kur do të mbahen zgjedhjet në veri.
“Në asnjë nga pikat e marrëveshjes nuk thuhet se çka do të ndodhë me bandat në veri. Na ka lodhur Albini në Kuvend duke thënë që ne do t’i luftojmë bandit, milicinë fashiste në veri, ne do të shtrijmë sovranitet në veri. Ku jemi sot? Pse asnjë pikë nuk është për shkatërrimin e bandave në veri. Çka ka bërë Albini në veri? Çdo qeveri ka mundur t’i bëjë të gjitha ato në ditën e parë të qeverisjes. Asgjë të re nuk ka sjellë në këtë pjesë. Problemi është se çka kemi fituar si Kosovë ne në këta dy muaj? Çka pas muajve pas përfundimit të verës siç e ka thënë se do të mbahen zgjedhjet? Çka do të ndodhë me flamujt që i ka vendosur në këto ndërtesa? Çka do të ndodhë me Asociacionin? Çfarë kompetenca do të ketë veriu në tërë këtë marrëveshje të asociacionit? Çka po na vjen neve si shtet”, deklaron deputetja e PDK-së./Gazeta Blic/
