Disa kompani janë të përfshira në skandalin e kontratës për eliminimin e rriqrave. Agjencia e Ushqimit dhe Veterinarisë në vend të të ilaçit kundër rriqnave, bleu ilaç kundër morrave. Në konzorciumin e kompanive ishte edhe ‘Vector Pest Control SH.P.K; ku aksionar është Hamit Tafaj. Biznesmeni, Tafaj është edhe përfaqësuesi i ‘Pavin Caffes’ në Kosovë.
Në media është publikuar një skandal, afër 1 milion euro dëm i kanë shkaktuar shtetit, Agjencia e Ushqimit dhe Veterinarisë (AUV) përmes nënshkrimit të një kontrate për eliminimin e rriqrave, bartës të një sëmundjeje vdekjeprurëse.
Ky skandal është zbuluar nga një raport i auditimit të brendshëm të AUV-së, i siguruar nga Periskopi. Në raport evidentohen mashtrime të rënda kontraktuale që e bëjnë tenderin jo vetëm të paefektshëm, por një rrezik të drejtpërdrejtë për shëndetin e njerëzve dhe kafshëve.
Kush është përfshirë në skandalin me rriqrat në Malishevë?
Grupi i Operatorëve Ekonomik në vend se ta kryente punën me preparatin e duhur për t’i dezinsektuar fermat kundër rriqrave, ka përdorur preparat kundër morrave.
Grupi i operatorëve ekonomik: FIDAN KRASNIQI BI SH.P.K; THERANDA VETS SH.P.K; Vector Pest Control SH.P.K; Jusuf Berisha; Ganimet Pirana B.I; Bujar F. Ejupi B.I kanë mashtruar kur kanë përdorur preparatin e quajtur Deltanil, sepse nuk i vret rriqrat, por morrat dhe mizat .
Gazeta Insajderi ka provuar të marrë përgjigje nga kompanitë e përfshira, por që nuk janë deklaruar.
Një nga kompanitë që ishte në konzorcium është edhe Vector Pest Control SH.P.K.
Në bazë të dhënave në ARBK, aksionar me 55 për qind të aksioneve në këtë kompani është biznesmeni Hamit Tafaj.
Tafaj, është edhe përfaqësues i brendit ndërkombëtar Pavin Caffe ne Kosovë.
Lidhur se kush merr përgjegjësinë për skandalin me rriqra, Insajderi ka pyetur edhe biznesmenin Tafaj por i njëjti nuk i është përgjigjur pyetjeve të redaksisë.
Në anën tjetër, nga AUV të pyetur për gjetjet e raportit të auditimit, deklaruan se se preparati i përdorur që u dyshua se është kundër morrave mund të përdoret edhe ndaj rriqrave.
“Preparati i përdorur në këtë aktivitet ka qenë “Deltanil Pour-On”, nga prodhuesi Virbac, Francë. Ky është një produkt veterinar i regjistruar në Regjistrin e Produkteve Medicinale Veterinare dhe përdoret kryesisht për kontrollin e ektoparazitëve te kafshët në ferma. Preparati i përdorur ka ofruar siguri, cilësi dhe efikasitet të lartë, ndërsa karenca e tij pas përdorimit është në përputhje me standardet e kërkuara për substancat aktive dhe limitet maksimale të lejuara në produktet me prejardhje shtazore. ë gjitha preparatet e përdorura nga AUV që nga viti 2013 për repelimin e kafshëve kanë pasur të njëjtën substancë aktive. Suksesi i zbatimit të këtyre masave në komunat e përmendura ka rezultuar që deri më tani të mos kemi humbje jete nga kjo sëmundje, e cila mbetet nën kontroll”, thuhej në përgjigjen e dhënë për Insajderin.
Por, gjatë një procesi auditimit të brendshëm rezultoi se se preparati i përdorur Deltanil nuk është i lejuar për përdorim te dhitë, ndërsa efektshmëria e tij për gjedhët është e kufizuar vetëm ndaj morrave dhe mizave, por jo ndaj rriqrave.
Ky preparat që është përdorur nga operatorët ekonomik e ka bërë kontratën rrjedhimisht të paefektshme duke mos e eliminuar rrezikun nga sëmundja Ethet Hemoragjike Krime-Kongo, por duke rrezikuar shëndetin e qytetarëve.
