Një konflikt për çështje prone ka degjeneruar në dhunë të rëndë fizike mbrëmjen e 31 majit 2025 në fshatin Frashër të Komunës së Mitrovicës, ku pesë persona janë përfshirë në një përleshje brutale, ku dyshohet se janë përdorur edhe mjete të forta – përfshirë një sopat.
Burime të Sinjalit bëjnë të ditur se rasti ka ndodhur rreth orës 19:15, në rrugën “Dora Vegman”, ku pas një mosmarrëveshjeje verbale për një pronë, situata ka eskaluar në dhunë fizike mes anëtarëve të dy familjeve.
Të dyshuar në këtë rast janë: N.B, 51 vjeçar, N.B, 41 vjeçar, K.B,19 vjeçar dhe S.H, 58 vjeçar.
Viktimë e sulmit është A.H, i cili së bashku me katër të tjerë ka kërkuar ndihmë mjekësore, pasi disa prej tyre kanë pësuar lëndime të rënda në kokë dhe fytyrë.
Në vendin e ngjarjes kanë intervenuar njësitet e hetimeve dhe krimteknika, të cilët kanë gjetur dhe sekuestruar një sopat, që dyshohet se është përdorur gjatë përleshjes.
Pas trajtimit mjekësor, të gjithë të përfshirët janë shoqëruar në stacionin policor, ku janë intervistuar në prani të avokatëve mbrojtës.
Në konsultim me Prokurorin kujdestar, rasti është kualifikuar si “Lëndim i rëndë trupor” dhe “Kanosje”, ndërsa është marrë vendim që: Tre nga të dyshuarit të dërgohen në mbajtje për 48 orë, Një person të procedohet në gjendje të lirë për veprën penale “Kanosje”.
Hetimet për këtë rast të rëndë janë ende në zhvillim dhe pritet të zbardhen motivet e plota dhe përgjegjësia individuale e secilit të përfshirë.
