Një incident i rëndë është raportuar pasditen e së premtes në rrugën “Lidhja e Lezhës” në Vushtrri, ku pesë persona janë përfshirë në një përleshje fizike pas një mosmarrëveshjeje mes tyre.
Sipas raportit të Policisë së Kosovës, ngjarja ka ndodhur rreth orës 16:50 dhe ka rezultuar me lëndime trupore për dy nga të dyshuarit, të cilët më pas kanë marrë trajtim mjekësor në institucionet shëndetësore.
Hetimet e para tregojnë se konflikti ka nisur pas një debati verbal, i cili më pas ka përshkallëzuar në dhunë fizike. Policia ka dalë menjëherë në vendin e ngjarjes, ku ka arrestuar të dyshuarit dhe ka marrë në pyetje të gjithë të përfshirët.
Me urdhër të prokurorit të shtetit, dy persona janë ndaluar për 48 orë, ndërsa tre të tjerë janë liruar në procedurë të rregullt.
Rasti është cilësuar si “Lëndim i rëndë trupor dhe pjesëmarrje në rrahje”, dhe hetimet po vazhdojnë për të sqaruar motivet e konfliktit dhe rolin e secilit të përfshirë në incident.
