Rrahjet e përleshjet mes nxënësve në shkollat fillore e të mesme janë shumë të shpeshta. Drejtoritë shpesh detyrohen të kërkojnë ndihmën e Policisë për të intervenuar në incidente të tilla që ndodhin brenda hapësirave të shkollave. Një rast i tillë dyshohet se ka ndodhur sot në Ferizaj, ku dy nxënës të një shkolle të mesme janë përfshirë në një incident.
Ngjarja dyshohet të ketë ndodhur në gjimnazin ”Kuvendi i Arbërit”, ku pas një mosmarrëveshjeje, një nxënës ka sulmuar me thikë një nxënës tjetër dhe për pasojë i mituri ka pësuar lëndime të rënda trupore.
Nxënësi u dërgua në spital për trajtim mjekësor dhe më pas ka dhënë deklaratë para hetuesve policorë lidhur me rastin që ndodhi në klasën e tyre.
Në anën tjetër, Policia e ka konfiskuar thikën që është përdorur, si dhe ka shoqëruar të dyshuarin në stacion policor, ku është intervistuar lidhur me rastin për të cilin dyshohet.
Pas përfundimit të procedurave policore, Prokurori i Shtetit ka urdhëruar ndalimin e të dyshuarit dhe inicimin e rastit si ‘Lëndim i rëndë trupor”.
Kujtojmë se kjo dukuri është bërë mjaft shqetësuese edhe për prindërit, për shkak të sigurisë në këto institucione arsimore.
