“Nuk kam lindur për të luajtur si mbrojtës i krahut”. Federico Valverde i tha këto fjalë në Almaty të Kazakistanit, më pak se 200 milje larg kufirit me Kinën, në shtator të vitit 2025, shkruan “Diario AS”.
Në atë kohë, ato u interpretuan si një thumbim ndaj Xabi Alonsos, i cili e kishte aktivizuar si mbrojtës të krahut për shkak të nevojës.
Megjithatë, kjo nuk ishte një përvojë e re për uruguaianin.
Edhe Carlo Ancelotti e kishte përdorur shpesh si anësor të krahut të mbrojtjes.
Valverde e pranoi këtë rol, por nuk i pëlqente veçanërisht. Edhe këtë sezon, rrethanat e kanë shtyrë José Mourinhon të veprojë në të njëjtën mënyrë.
Kjo funksionoi shkëlqyeshëm kundër Villarrealit. Nga ai pozicion, Valverde asistoi Diomanden për golin e fitores. Por Mourinho e njeh situatën dhe e bëri të qartë këtë pas ndeshjes.
“Ne kemi dy mbrojtës të mirë të krahut. Ajo që bëri Fede ishte një zgjidhje për një situatë specifike”, tha ai.
Kjo nuk është diçka e re në historinë e Real Madridit. “AS” ka biseduar me Fernando Hierron, Gutin, Iván Campon, Rafa Alkortan dhe Miguel Torresin, pesë veteranë që e dinë mirë se çfarë do të thotë të luash jashtë pozitës tënde dhe që kanë disa këshilla për Valverden.
Të jesh në gjendje të luash në disa pozita është, në parim, një përparësi. Por kjo nuk është një rregull absolut.
“Kur lojtarët zhvendosen shumë shpesh nga një pozitë në tjetrën, në fund fillojnë ta humbin vetëbesimin”, tha Hierro, ish-mbrojtësi qendror që kaloi shumë kohë edhe si mesfushor defanziv dhe shënoi 127 gola për Real Madridin.
Miguel Torres, një lojtar i specializuar në mbrojtje, i cili luajti në të katër pozitat e repartit defensiv, i sheh edhe anët pozitive të kësaj situate.
“Nëse mund të paraqitesh mirë në disa pozita, i rrit gjasat për të luajtur. Kur disa trajnerë të përdorin në pozita të ndryshme, kjo ndodh sepse e vlerësojnë aftësinë tënde për t’u përshtatur, inteligjencën taktike dhe përkushtimin ndaj ekipit. Unë gjithmonë e kam parë këtë si shenjë besimi”, tha ai.
Valverde nuk mund të befasohet kur i kërkohet të luajë si mbrojtës i krahut. Ai e njeh mirë këtë pozitë. Për të tjerët, kalimi në një rol të tillë vjen krejt papritur, ashtu siç ndodhi me Iván Campon.
Te Real Madridi, Campo luajti si mbrojtës qendror si në skemën me katër, ashtu edhe në atë me pesë mbrojtës, përfshirë finalen e Ligës së Kampionëve në vitin 2000. Më vonë, te Boltoni, ai u shndërrua papritur në një prej lojtarëve më të dashur të tifozëve, duke luajtur si mesfushor.
“Përpara meje i kisha Djorkaeffin dhe Okochan, ndërsa të luaja në mesfushë me ta nënkuptonte se duhej të përshkoja shumë hapësirë. Por trajneri Sam Allardyce më tha pak para një ndeshjeje kundër Arsenalit të pathyeshëm, ku luanin Henry dhe të tjerët, se do të luaja në mesfushë. Nuk e kishim provuar këtë në stërvitje apo diçka të ngjashme. Kishim dalë në fushë pak para ndeshjes dhe ai ma tha këtë”, tha ai.
Pra, dilema është e qartë: Ku duhet të luajë Valverde?
Guti, një mesfushor natyral që gjatë sezonit 2000/01 u detyrua të luante si sulmues i improvizuar dhe shënoi 18 gola, do të preferonte ta shihte uruguaianin në krah.
“Si mesfushor defanziv, ai shkëlqen më së paku. Në krah, si më i avancuar, ashtu edhe si mbrojtës i krahut, ai e ka pozitën më të mirë për shkak të fuqisë, aftësive fizike dhe mundësisë për ta dhënë pasimin e fundit. Aty do të binte shumë më tepër në sy”, tha Guti.
Miguel Torres pajtohet me ish-bashkëlojtarin e tij.
“Fede ka arritur në një pikë ku duhet të mendojë se në cilin drejtim dëshiron ta çojë karrierën e tij. Nuk kam asnjë dyshim se si mbrojtës i djathtë apo si anësor i krahut të mbrojtjes, ai mund të bëhet njëri prej më të mirëve në botë. Ai ka një mundësi të jashtëzakonshme për të qenë lojtar vendimtar për shumë vite”, u shpreh ai.
Iván Campo nuk është aq i bindur.
“Ai luan një rol thelbësor në mesfushë, por ka nevojë për më shumë ndihmë nga bashkëlojtarët. Nuk mund të përshkojë aq shumë hapësirë për të dalë përpara, për të mbrojtur dhe për ta qarkulluar topin…”, tha Ivan.
Ndërkohë, Alkorta beson se Real Madridi duhet t’ua lërë punën e mbrojtjes mbrojtësve të mirëfilltë.
“Nuk mendoj se Valverde është më i mirë në atë pozitë sesa Dumfries apo Trent, dhe kjo po thotë shumë, sepse asnjëri prej tyre nuk është ndonjë mbrojtës i shkëlqyer. Por nëse e krahason, për shembull, me Carvajalin… Nëse Mourinho beson se ai është opsioni më i mirë, ne do ta respektojmë këtë. Por, duke qenë se nuk është mbrojtës i krahut nga natyra, nuk jam i bindur”, tha ai.
