Gazetari dhe publicisti i njohur shqiptar, Blendi Fevziu, në një intervistë për Euronews ka thënë se një burim diplomatik ndërkombëtar i ka treguar se si njerëz të rëndësishëm të politikës së Kosovës iu thonë të huajve që Kosova s’do të ketë qetësi nëse kthehen Hashim Thaçi, Kadri Veseli, Jakup Krasniqi e Rexhep Selimi.
Ai ka sqaruar se bëhet fjalë për aspektin politik, megjithatë thotë se është shumë cinike që të thuash një gjë të tillë.
“Unë kam një informacion që mund ta bëjë publik që më ka ardhur nga nivele të larta ndërkombëtare, diplomatike, që njerëz të rëndësishëm të politikës së Kosovës iu thonë ndërkombëtarëve që po u kthyen ata të katërt, Kosova s’ka qetësi. Çfarë do me thënë kjo, pse për qetësinë e Kosovës, qetësinë e katër vetave dhe qetësinë e një njeriu që mendon se është në krye të vendit do të sakrifikohen katër njerëz që e kanë sakrifikuar jetën një herë për Kosovën… Në kuptimin politik, pra ideja është na mbani ata brenda që të jemi një çik më rehat këtej. Kjo është cinike. Nuk mund ta bëj publik emrin, sepse personi që ma ka thënë në konfidencë ka qenë njeri i bisedimeve”, ka deklaruar Blendi Fevziu në “Review” të Euronews.
Lidhur me këtë deklaratë, Gazeta Express sot e ka kontaktuar autorin e emisionit “Opinion” për ta pyetur për emra konkret dhe nëse janë aktiv në politikën kosovare “njerëzit e rëndësishëm të politike kosovare”.
Fevziu në përgjigjen e tij ka thënë se nuk ka emra, derisa shton se është saktësisht ashtu siç ka deklaruar.
“Jo, nuk kam emra, por është ekzakt siç kam thënë”, ka thënë gazetari shqiptar për Gazetën Express i pyetur se a i janë thënë emra, nëse mund t’i zbulojë ata dhe nëse janë aktiv aktualisht në institucionet e shtetit të Kosovës.
Ai ka thënë se nëse do të kishte diçka më shumë për ta thënë do ta thoshte gjatë intervistës në televizion.
“Po të thosha më shumë e thosha në TV. Aq sa iu kam thënë”, ka përfunduar Fevziu.
Një deklaratë e tillë e Fevizut ka ardhur në kohën kur ka filluar gjykimi në Hagë kundër ish-presidentit Hashim Thaçi, Kadri Veselit, Rexhep Selimit e Jakup Krasniqit. Gjatë ditës së hënë janë dëgjuar pretendimet e Prokurorisë Speciale të Hagës, derisa sot janë duke e thënë fjalën e tyre mbrojtja dhe ish-krerët e UÇK-së.
Një ditë para fillimit të procesit të gjykimit, në Prishtinë është mbajtur një marsh i organizuar nga Partia Demokratike e Kosovës në përkrahje të ish-krerëve të UÇK-së të cilët po akuzohen në Hagë.
Në përkrhaje të këtij marshi ka dalë edhe kryekuvendari Glauk Konjufca. Derisa Lëvizja Vetëvendosje në njoftimin për përkrahjen e këtij marshi kishe përmendur vetëm ish-shefin e Grupit Parlamentar, Rexhep Selimin.
