Haki Latifi poet dhe veprimtar i çështjes kombëtare që jeton në Zvicër, sapo ka botuar librin e titulluar “RRËNJËT E FISIT TË LASHTË”, nga shtëpia botuese “Fidani” në Prizren, të drejtuar nga shkrimtari Berat Batiu.
Më poshtë po japim pjesë nga recensioni i poetit dhe kritikut letrar, Skënder Zogajt.
VARGJE TË SINQERTA
ME DASHURI TË PASTËR
I lindur më 1962 në Piranë të Prizrenit, Haki Latifi u rrit në një familje arsimdashëse, e cila shkollimin e fëmijëve e kishte preokupim kryesor. Hakiu pas shkollës fillore kryen shkollën e mesme dhe studimet për Gjuhë e letërsi në SHLP të Prizrenit dhe emërohet arsimtar në shkollën e fshatit të lindjes. Është koha kur regjimi policor e ushtarak serb i ndjek dhe i ndëshkon të gjithë shqiptarët që refuzojnë zbatimin e masave okupuese. Kësaj nuk i shpëton as Hakiu, i cili detyrohet të largohet nga Kosova dhe të vendoset në Zvicër. Mësuesi i ri, i brumosur me idealet iluministe të Rilindjes kombëtare, menjëherë lidhet me qarqet e mërgimtarëve dhe i rreket veprimtarisë atdhetare, duke u bërë pjesë e lëvizjes së madhe demokratike të Kosovës në krye me liderin historik Ibrahim Rugova, i cili fton shqiptarët për “Liri e demokraci” me sloganin “Me laps në Evropë”. Kësaj fryme i gjegjet dhe i shërben fuqishëm Haki Latifi, duke qenë në fokusin e veprimtarive atdhetare në Zvicër e më gjerë, që detyrë jetike kanë për ta ndihmuar materialisht dhe njëkohësisht për ta forcuar përpjekjen çlirimtare të popullit shqiptar të Kosovës në mposhtjen e robërisë. Hakiu vihet i tëri në shërbim të lirisë së atdheut.
2.Në shembullin e Rilindësve tanë, Haki Latifi e hap kuletën dhe e mpreh lapsin në shërbim të çështjes së atdheut. Ndër të parët nis organizimin e mërgimtarëve për grumbullimin e ndihmave për bashkatdhetarët në Kosovë, që okupatori po tentonte t’i gjunjëzonte përmes urisë, e njëherësh është ndër më aktivët në organizimin e tubimeve protestuese në Zvicër e më gjerë, për t’iu kundërvënë propagandës agresive dhe gënjeshtare serbe kundër shqiptarëve. Për këtë qëllim, Haki Latifi ka dhënë kontributin të vlershëm edhe nëpërmjet të shkrimeve, publicistike dhe letrare, që pasqyrojnë botën e pasur shpirtërore dhe idealizmin e tij të flaktë kombëtar. Shkrimet publicistike lexuesit kanë pasur rastin t’ia lexojnë nëpër periodikun e kohës, ndërsa krijimet poetike të përmbledhura në vëllimin me titullin simbolik “Rrënjët e fisit të lashtë” tash po e shohin dritën e botimit nën përkujdesjen e shtëpisë botuese “Fidani” në Prizren.
Fjala e autorit Haki Latifi
Libri i parë qenka emocion dhe përjetim i rrallë. Ëndrra ime u realizua…
Të nderuar miq,
Sot, SHTËPIA BOTUESE „FIDANI“ në Prizren, botoi librin tim të parë me titull : “RRËNJET E FISIT TË LASHTË”.
Një falënderim e mirënjohje e veçantë shkon për miqtë; recensentin e këtij libri, Skënder Zogaj, së bashku me lektorin z.Musa Bushrani. Kështu, të dy, me vërejtjet, sugjerime konkrete, i kontribuuan përmbajtjes së librit, duke i vlerësuar shkrimet e mia me përkushtim e profesionalizëm.
Përgatitjen teknike, pra edhe rregullimin e treguesit të titujve e ka bërë Berat Batiu, të cilin gjithashtu e falënderoj, duke i dëshiruar suksese në punën e tij profesionale.
Falënderim të veçantë i dedikohet mbesës sime Dafina Latifi për pamjen e kopertinës së librit.
Falënderim të posaçëm i shpreh bashkëshortes sime, Nexhmijës, e cila gjatë pjesës më të madhe të kohës, sa jemi bashkë, mori mbi vete barrën e përkujdesjes për ekonominë familjare, duke më mundësuar kështu vazhdimin e veprimtarinë shoqërore dhe atdhetare në dobi të vendit.
