Policia e Kosovës ka dhënë detaje për arrestimin e disa zyrtarëve të Partisë Socialdemokrate – PSD, gjatë aksionit të sotëm të kësaj të fundit në objektin e Zyrës së Rregullatorit për Energji.
Sipas policisë, zyrtarët e PSD-së janë arrestuar nën dyshimet për pengim të personave zyrtarë në kryerje të detyrës.
Në njoftim është bërë e ditur se në aksionin e sotëm të PSD-së janë arrestuar në total 13 persona.
Në mesin e të arrestuarve është edhe kryetari i PSD-së, Dardan Molliqaj.
Njoftimi i plotë nga policia:
Sot rreth orës 15:00, në rrugën “Bekim Fehmiu” në Prishtinë, saktësisht në objektin e ZRrE-së, me urdhër të prokurorit të shtetit, janë arrestuar 13 persona.
Megjithëse policia vazhdimisht u ka bërë thirrje që të dalin nga objekti dhe të vazhdojnë aktivitetin e tyre, duke mos penguar zyrtarët e institucionit në fjalë, të njëjtit nuk janë bindur.
Duke parë që kanë dështuar të gjitha përpjekjet tjera, në përputhje me autorizimet policore dhe urdhrin e prokurorit të shtetit, janë arrestuar 13 nga ta dhe aktualisht po vijon ndërmarrja e veprimeve në këtë fazë preliminare hetimore.
Pas përfundimit të procedurave të nevojshme policore, konform rekomandimit të prokurorit të shtetit për cilësimin e veprës për të cilën dyshohen, personat e arrestuar do të procedohen më tej.
