Ende ndodhen në arrati, Mefail Shkodra bashkë me dy djemtë e tij, Edoni dhe Engjull Shkodra të dyshuar për vrasjen e trefishtë në qendër të Gjilanit.
Nga Policia në Gjilan kanë thënë për Gazetën Online Reporteri.net se po punohet intensivisht për kapjen e tyre.
Zëdhënësi i policisë për rajonin e Gjilanit, Ismet Hashani tha se janë zhvilluar bastisje në lokacione të ndryshme ku kanë dyshuar se janë duke u strehuar të dyshuarit.
“Policia e Kosovës ka ndërmarrë masa të shtuara për lokalizimin dhe arrestimin e të dyshuarve të këtijë rasti të rëndë. Janë zhvilluar shumë bastisje në lokacione të ndryshme ku kemi besuar se mundë të strehohen të dyshuarit”, tha Hashani për Reporteri.net.
Hashani gjithashtu tha se janë njoftuar edhe të gjitha pikat kufitare që nga momenti i parë kur është raportuar rasti.
“Përveç masave operative që i kemi në vazhdimësi kemi apeluar edhe përmes mediave duke i bërë publike profilet e personave të dyshimtë të kërkuar dhe kushdo që posedon informacion në lidhje me vendëndodhjen e tyre ta kontaktoj Policinë e Kosovës ku do qoftë në stacionin ma të afërt. Janë njoftuar të gjitha pikatë kufitare që nga momenti i parë kur është raportuar rasti”, tha për Reporteri.net, zëdhënësi i policisë për rajonin e Gjilanit, Ismet Hashani.
Janë bërë dy ditë nga ngjarja tragjike në qendër të Gjilanit. Nga ky rast mbetën të vrarë babë e bir, argjendar, dhe një person tjetër, i cili vdiq në QKUK, pasi nuk arriti t’u mbijetojë plagëve. Kurse personi i katërt i plagosur, gjendja e tij tashmë është stabile.
Policia po të dielën kur ndodhi rasti shpalli në kërkim Mefail Shkodrën dhe djalin e tij, Edonisin, të dy të arrestuar në fund të muajit qershor të vitit 2024 për fajde. Po atë ditë, pasdite, Policia shpalli në kërkim djalin tjetër të të dyshuarit për vrasjen e trefishtë, Engjullin.
Gjykata Themelore në Gjilan të hënën doli me një sqarim ku tha se Mefail Shkodra s’kishte lëndë aktive, por që në të kaluarën kishte qenë i dënuar për tri vepra penale, të cilat ishin të përfunduara.
Në anën tjetër, Gjykata Themelore e Prishtinës dha sqarime po dje për lirimin e Mefail dhe Edonis Shkodrës, ku thuhej se kishin ofruar një parcelë në të cilën kishte dy objekte të ndërtuara dhe që plotësonin dorëzaninë e kërkuar nga Prokuroria Speciale e Kosovës në vlerë prej 70 mijë euro, 50 mijë për Mefail Shkodrën dhe 20 mijë për djalin e tij, Edonisin.
“Me datë 08.10.2024 Gjykata Themelore në Prishtinë, Departamenti Special ka pranuar Propozimin për Zëvendësimin e masës së Paraburgimit me masën e Dorëzanisë nga Prokuroria Speciale e Republikës së Kosovës për çështjen penale ndaj të pandehurve M.Sh. dhe E.Sh., ( lidhur me të pandehurin M.Sh. është propozuar dorëzania në vlerë prej 50,000.00 € (pesëdhjetë mijë euro), ndërsa ndaj të pandehurit E.Sh. është propozuar dorëzania në vlerë prej 20,000.00 € (njëzetë mijë euro)”, thuhej në njoftimin e Gjykatës.
Prokuroria Speciale e Kosovës në një komunikatë të lëshuar, tha se Mefail Shkodra ishte liruar pasi s’kishte më kushte për vazhdimin e paraburgimit ndaj tij, por që i njëjti po hetohet për dy raste.
Lidhur me vrasjen e trefishtë, Inspektorati Policor i Kosovës të hënën e 11 gushtit, suspendoi nga puna katër zyrtarë policorë. Gazeta Online Reporteri.net raportoi qysh dje se zyrtarët e suspenduar janë Bekim Sabedini, Ardian Demiri, Metush Arifi dhe Shaban Hajdaraj. Sabedini- rreshter në Njësinë e Hetimeve Rajonale në Drejtorinë e Policisë në Gjilan, Demiri – hetues në Stacionin Policor në Gjilan, Arifi – polic në Njësinë e Reagimit të Shpejtë në Drejtorinë në Gjilan si dhe Hajdari – rreshter – Shef i Hetimeve në Stacionin Policor në Novobërdë.
Po më 11 gusht, në polici, mbrëmjen e së hënës është dorëzuar djali tjetër i Mefail Shkodrës, Enisi, i cili është ndaluar për 48 orë.
