Kryetari i Partisë Demokratike (DS), Zoran Lutovac, tha se duke folur për zgjedhjet, presidenti serb Aleksandar Vuçiq e largon vëmendjen nga përgjegjësia e progresistëve për dhunën në shoqëri.
Lutovac i tha agjencisë Beta se presidenti Vuçiq është duke u “rrokullisur” dhe duke u përpjekur të largojë vëmendjen nga ngjarjet tragjike në Baçka Pallanka, kur një gjysh dhe nip u vranë për shkak të neglizhencës së autoriteteve.
“Vuçiq po ofron zgjedhje të rreme në të cilat pa lirinë e mediave dhe me shantazh, presion dhe vjedhje votash, gjoja do të qetësoheshin tensionet politike dhe të gjitha tensionet dhe dhuna në shoqëri. Vuçiq, në vend që të diskutojë për tragjedinë në Baçka Pallankë, po merret me zgjedhjet”, tha kryetari i DS-së.
Ai bëri të ditur se presidenti Vuçiq po përpiqet me çdo mënyrë të shmangë përgjegjësinë e progresistëve për gjendjen shumë të keqe të vendit.
“Në mesin e verës së vitit 2023, Vuçiq po mban një konferencë për shtyp ku flet për “sukseset” e vitit 2027 dhe i përgjigjet problemeve kryesore përmes pyetjeve të kornizuara nga gazetarët e mediave të regjimit”, tha Lutovac.
“Vuçiq nuk i ka ofruar askujt zgjedhje në Beograd”
Ai tha se nuk është i vërtetë pretendimi i Vuçiqit se i ka ofruar opozitës 50 herë shpalljen e zgjedhjeve në Beograd.
“Në vitin e kaluar, Vuçiq nuk i ka ofruar askujt që të thërrasë zgjedhje të jashtëzakonshme në Beograd. Nuk është e saktë as deklarata e tij se ka thirrur vazhdimisht opozitën për bisedime. Asnjëherë zyrtarisht nuk kemi marrë ndonjë ofertë nga ai për intervistë apo diçka tjetër”, tha Lutovac.
Presidenti serb Aleksandar Vuçiq tha të martën se zgjedhjet e jashtëzakonshme lokale në Beograd, nëse opozita dëshiron, mund të mbahen në dhjetor të këtij viti ose në pranverën e vitit të ardhshëm, por shtoi se opozita nuk ka vendosur nëse do të mbahen zgjedhje të tjera ne te njëjtën kohe..
