Ndërmarrja publike Posta e Kosovës po vazhdon ta mbajë të fshehtë raportin e punës së Muharrem Mustafës, i angazhuar si konsulent i jashtëm për mbështetjen e procesit të ristrukturimit në ndërmarrje publike. Puna e tij parashihej të zgjaste dy muaj.
Gazeta Insajderi ka kërkuar për të dytën herë qasje në dokumente publike për ta kërkuar raportin e punës të Mustafës për këto dy muaj sa qe i angazhuar.
Për shkak të mungesës së një përgjigje nga Posta, Insajderi iu është drejtuar para disa ditësh Agjencisë për Informim dhe Privatësi, për të pasur qasje në këtë raport pune dhe është në pritje të një vendimi.
Burime të Gazetës Insajderi kanë bërë me dije se Muharrem Mustafa është i angazhuar edhe në Presidencën e Kosovës, për çka edhe është pyetur Posta e Kosovës. Megjithatë, mediumi s’ka marrë përgjigje.
Vitin e kaluar, mediumit iu refuzua qasja nën pretendimin se të gjitha dokumentet që ndërlidhen me punën e Muharrem Mustafës janë ende drafte.
“Ju njoftojmë se dokumentet/draft struktura dhe të gjitha dokumente që lidhen me ristrukturim të PK Sh.A., të konsulentit të jashtëm të z. M. Mustafa janë ende drafte, dhe si të tilla edhe me ligjin për qasje në dokumente publike nenin 1.2(Dokument Publik– nënkupton çdo akt, fakt apo informatë në formë elektronike apo me zë, formë të shtypur, në incizime vizuale apo audiovizuale të prodhuara apo mbajtura nga institucioni publik)., andaj si të tilla nuk janë dokumente ende të aprovuara përkatësisht të prodhuara nga PK Sh.A., siç kërkon neni 1.2 i ligjit për qasje në dokumente publike“, thuhej në përgjigjen e Postës në nëntor të këtij viti.
Megjithatë, raportin e tij të punës në janar të këtij viti kishte arritur ta nxjerrë sindikata e ndërmarrjes, nëpërmjet AIP’it.
Posta e Kosovës më 19 korrik nënshkroi kontratë për “Angazhimin e një konsulenti të jashtëm për mbështetjen e procesit të ristrukturimit në NPQ, Posta e Kosovës sh.a”.
Vlera e parashikuar e kësaj kontrate ishte 10 mijë euro.
Posta e Kosovës e angazhoi si konsulent të jashtëm Muharrem Mustafën, me pagë prej 7 mijë e 779 euro.
Në detajet e kontratës, theksohej se angazhimi i këtij konsulenti nga Posta e Kosovës është 60 ditë, apo dy muaj.
Kalkuluar kjo, i bie që konsulenti Muharrem Mustafa për një muaj u pagua 3889 euro.
Një burim brenda kësaj ndërmarrjeje, e ka përshkruar punën e tij në mënyrë të këtillë: “I ka marrë tetë mijë euro për disa takime gjatë dy muajve”.
