Berat Gjimshiti është një shembull për t’u ndjekur.
Jo vetëm në fushën e blertë, por mbi të gjitha jashtë saj.
Një njeri i durueshëm, një punëtor i palodhshëm.
E kur i ke këto virtyte, s’ka se si të mos arrijë suksesi.
Futbollisti shqiptar nga Lugina ishte lënë jashtë Kampionatit Evropian të vitit 2016 nga Shqipëria.
Por, qendërmbrojtësi me zemër të madhe nuk u zemërua aspak.
Përkundrazi, ky ishte një motiv dhe një shtysë për të, pasi u kthye të punonte edhe më fort.
Shpejt u bë shtylla e mbrojtjes së Atalantës, skuadër që shënonte rritje të madhe në Itali.
Kishte shkuar në këtë ekip kur bergamaskët po luftonin për të mbetur në Serie A, por dalëngadalë kjo skuadër u bë mjaft e respektuar dhe më pas edhe e fuqishme në Itali.
Berati e mori shiritin e kapitenit të Shqipërisë dhe si lider i udhëhoqi Kuqezinjtë drejt kualifikimit shumë të merituar në Euro 2024, ku synon të tregohet po ashtu i suksesshëm në muajin e ardhshëm me “Shqiponjat”.
Shiriti i kapitenit ishte në krahun e Gjimshitit edhe në finalen e Ligës së Evropës mbrëmë ndaj Bayer Leverkusenit.
“Jam krenar, sot e mësova se do ta mbaj shiritin në krah. Grupi është fantastik, luajtëm shumë mirë dhe fituam me meritë”, tha pas ndeshjes i emocionuar dhe mjaft i lumtur kapiteni “kuqezi”.
Ai me shokë e deklasuan kampionin gjerman që nuk njihte humbje tash e 51 ndeshje, Leverkusenin.
“Është e vështirë t’i gjesh fjalët tani, as që po e kuptoj se çfarë bëmë. Një sukses kaq i madh, pas finales së humbur në Kupën e Italisë, është i pabesueshëm. Megjithatë tani nuk më interesojnë tri finalet e humbura paraprakisht”, vazhdoi “muri” i mbrojtjes së Atalantës.
“Nuk do ta kisha imagjinuar kurrë. Kur arrita në këtë ekip, situata dhe pritshmëritë ishin të ndryshme, ne po luanim për ta shmangur rënien nga liga. Ardhja e Gasperinit solli një filozofi të re, ai gjithmonë dëshiron t’i përmirësojë lojtarët dhe t’i bëjë ata të performojnë dhe ta japin më të mirën e tyre. Pastaj pas disa viteve fillova ta imagjinoj një moment të tillë, ndoshta jo Europa Leaguen, ndoshta më shumë Kupën e Italisë, por sot e meritojmë të gjithë këtë”, përfundoi Gjimshiti.
Në fund, ylli shqiptar nga Lugina e ngriti lart trofeun e parë evropian për Atalantan – hiq më pak se trofeun e Ligës së Evropës, që është i dyti për nga rëndësia në nivel klubesh, pas atij të Ligës së Kampionëve.
Fjalë pak, e punë shumë!
Zonja dhe zotërinj, ky ështe kapiteni fantastik shqiptar, BERAT GJIMSHITI!/Express
