Kryetari i Komunës së Istogut, Ilir Ferati, i cili po garon për një mandat të dytë, ka dështuar të përmbushë disa nga premtimet kryesore që kishte dhënë gjatë fushatës zgjedhore të vitit 2021.
Sipas vlerësimit të publikuar nga Instituti GAP në platformën “Letërnjoftimi i Komunave”, Ferati ka bërë gjithsej 78 premtime gjatë mandatit aktual (2021–2025). Nga to, 69 janë përfunduar, katër janë gjysmë të realizuara, 11 janë në proces, ndërsa tri premtime nuk kanë nisur ende.
Ku dështoi Ilir Ferati?
Një nga premtimet kyçe të Feratit ishte ndërtimi i një hapësire rekreative te burimi i ujit në Vrellë – projekt i cili, sipas raportit të GAP, nuk ka filluar fare.
Po ashtu, Ferati nuk ka realizuar premtimin për ndërtimin e “stacioneve të mençura” të autobusëve në zonat urbane të Istogut, përfshirë Vrellën, Banjën, Gurrakocin dhe Rakoshin.
Edhe në fushën e turizmit, kryetari aktual nuk ka arritur të përmbushë zotimet, shkruan Insajderi.
Ai kishte premtuar zhvillimin e turizmit malor përmes dhënies në shfrytëzim të pronave komunale në bjeshkët e Istogut për investitorë të interesuar në ndërtimin e kapaciteteve akomoduese.
Në vitin 2021, gjatë një takimi me Klubin Alpin “Podguri”, Ferati kishte premtuar realizimin e një plani investiv për ta shndërruar zonën malore të Istogut në një ofertë tri-ditore për turistët vendorë dhe ndërkombëtarë. Ky premtim gjithashtu nuk është përmbushur.
Pavarësisht këtyre dështimeve, Ilir Ferati ka konfirmuar kandidaturën e tij për zgjedhjet lokale të radhës, duke synuar edhe një mandat tjetër në krye të Komunës së Istogut./Insajderi.org/
