Kristian Prenga ka lënë gjurmë me paraqitjen ndaj Anthony Joshuas, pavarësisht humbjes me nokaut në raundin e dytë të meçit të zhvilluar në Jeddah të Arabisë Saudite.Boksieri shqiptar e nisi fuqishëm përballjen, duke e rrëzuar dy herë ish-kampionin e botës gjatë raundit të parë. Në ato momente, Prenga dominoi në ring dhe dukej se vetëm përfundimi i raundit e shpëtoi Joshuan nga një humbje e mundshme.
Megjithatë, britaniku u rikuperua në raundin e dytë dhe pas disa goditjeve të forta e rrëzoi Prengën, i cili nuk arriti të ngrihej përpara përfundimit të numërimit.Për 35-vjeçarin kjo ishte vetëm humbja e dytë në karrierë. Ai numëron 20 fitore, të gjitha të arritura me nokaut.
Pas meçit, Prenga tha se e pranon rezultatin si pjesë të vullnetit të Zotit.“Urime atij, por nuk ishte mbrëmja ime. Plani i Zotit ishte që ai të fitonte dhe unë jam në rregull me çfarëdo që ka vendosur Zoti”, deklaroi Prenga për revistën “The Ring”.
I pyetur se çfarë kishte menduar pasi e rrëzoi Joshuan në raundin e parë, ai tha se besonte se do ta përfundonte meçin në raundin pasues.“Kam menduar se do ta rrëzoja edhe në raundin e dytë, por kjo nuk ndodhi”, u shpreh ai.
Prenga foli edhe për mbështetjen e shqiptarëve në Jeddah, duke thënë se aty ndodhej vetëm një pjesë e vogël e tifozëve të tij.“Kam pasur vetëm 10 për qind të tifozëve këtu, pasi shumë nuk erdhën për shkak të luftës. Sikur meçi të zhvillohej në Evropë, do të kishte shumë më tepër shqiptarë”, tha ai.
Në fund, boksieri kërkoi falje nga mbështetësit.“U kërkoj falje. Nuk i kam bërë krenarë, por herën tjetër”, deklaroi Prenga.
Pas meçit, Joshua e vlerësoi lart kundërshtarin shqiptar dhe tha se ai ka potencial për të ardhmen.“Ai është djalë i fortë. Mendoj se Eddie Hearn dëshiron të nënshkruajë me të. Ka të ardhme të ndritur dhe, me më shumë përvojë, mund të arrijë në nivelet më të larta”, tha Joshua.
Para përballjes u intonua himni shqiptar, ndërsa Prenga hyri në ring me motive kombëtare. Në tribuna kishte shumë shqiptarë, disa prej tyre të veshur me kostume tradicionale.
