Presidentja e Republikës së Kosovës, Vjosa Osmani, zhvilloi sot një vizitë pune në Gjilan, ku u prit nga Kryetari i Komunës, Alban Hyseni, të cilin e uroi për mandatin e tij të dytë. Gjatë takimit, u diskutua për projektet që pritet të sjellin më shumë zhvillim, mundësi të reja dhe një vizion të qëndrueshëm për qytetin.
Presidentja vizitoi Shkollën e Muzikës dhe të Arteve Pamore, ku u prit me performanca nga Kori i Grave “Muza”, si dhe kopshtin “Integj”, ku u takua me fëmijët dhe edukatoret. Ajo vlerësoi atmosferën kreative dhe përkushtimin në institucionet arsimore të qytetit.
Gjatë vizitës, Osmani u njoftua edhe me arritjet e kompanisë InterPLAST TROCAL, të cilën e cilësoi si një shembull të inovacionit dhe punës së mirë në nivel rajonal.
Presidentja ndaloi edhe në klubin e futbollit “Drita”, ku përgëzoi ekipin për sukseset e tyre në arenën vendore dhe evropiane, duke theksuar se rezultatet e tyre e bëjnë Kosovën krenare.
Në përmbyllje, Presidentja Osmani falënderoi qytetarët e Gjilanit për mikpritjen dhe angazhimin e tyre të vazhdueshëm për të ardhmen e qytetit.
