Presidenti i Serbisë, Aleksandar Vuçiq, ka thënë se në bisedën me ambasadorin kinez, Li Ming, ka kërkuar mbështetjen e atij vendi në luftën për të vërtetën në Kombet e Bashkuara.
Vuçiq ka njoftuar në Instagram se e ka njohur ambasadorin me “iniciativat hipokrite në Asamblenë e Përgjithshme të OKB-së, kundër mbarë popullit serb” dhe ka kërkuar mbështetjen e Kinës në siç pretendon ai, ‘luftën për të vërtetën’.
“Mirënjohës për mbështetjen e vendosur dhe të palëkundur të Kinës për vendin tonë në forumet globale, theksova se në këto kohë të vështira, Serbia vlerëson partneritetin parimor dhe miqësinë e çeliktë që është demonstruar me vepra në momentet më të vështira për popullin dhe vendin tonë”, tha. Vuçiq.
Ai shtoi se me Li Ming ka diskutuar për çështje të rëndësisë kryesore dhe sfidat që e presin Serbinë në planin ndërkombëtar në periudhën e ardhshme, si dhe se i ka kërkuar që t’i përcjellë përshëndetjet e tij të ngrohta Presidentit Xi Jinping, “i cili kontribuoi në përparimin e madh të Serbisë me angazhimin e tij personal”.
Në një takim të mbyllur në Kombet e Bashkuara më 17 prill do të prezantohet Projekt-Rezoluta për Srebrenicën, e cila shpall 11 korrikun si Ditën Ndërkombëtare të Përkujtimit të Gjenocidit në Srebrenicë.
Duke pasur parasysh se Rusia ka humbur kapitalin e saj diplomatik për shkak të luftës në Ukrainë, Serbia tani po mbështetet më shumë te Kina. Ky ishte paralajmërimi që e dha Ana Krstinovska, presidente e Institutit ESTIMA në Maqedoni të Veriut, para një kohe
Krstinovska, e cila ka shkruar një hulumtim akademik, për (jo)marrëdhëniet Kosovë – Kinë thekson se Ballkani po përballet me propagandën kineze, teksa thekson se janë Serbia dhe rajoni i Republikës Srbska që po i nënshtrohen këtij ndikimi.
Sipas saj, ka një lidhje të drejtpërdrejtë midis asaj që bën Kina në nivel global dhe asaj që ndjehet si pasojë në rajonin e Ballkanit.
“Ne definitivisht nuk jemi të imunizuar ndaj kësaj dhe gazetarët duhet të jenë punëtorët e vijës së parë që do të nxisin debatin publik në mënyrë që qytetarët tanë të formojnë një opinion të informuar për praninë kineze”, tha ajo.
