Drejtori teknik i kompanisë InfraPlus, Agon Sadikaj ka bërë një reagim publik drejtuar të parit të Prishtinës, Përparim Rama, shkruan GazetaDemos.
Ky reagim vjen pas një postimi të Përparim Ramës rreth projektit të “Rrugës A”.
“Me shpresën që jeni i informuar nga stafi juaj, në fotot e mëposhtme për ilustrim po ju prezantoj projektin e përfunduar të “Rrugës A”, i cili në koordinim me stafin teknik të komunës së Prishtinës, përgjatë vitit 2021 është dizajnuar për ti dhënë zgjidhjen e duhur kësaj pjese të Prishtinës sipas “Planit Rregullues Urban Prishtina e Re”. Zgjidhja për të cilën është menduar më së shumti, që besoj është arsyeja kryesore e këtij projekti ishte lidhja direkt e rrugës M2 me Rrugën A, duke shkarkuar në mënyrë të konsiderueshme komunikacionin te rrethrrotullimi në rrugën M2 dhe rrethrrotullimi i ashtuquajtur “Rrethrrotullimi me Flamur”, ka shkruar ai.
Sipas tij ky projekt përveç tjerash ka paraparë një profil me rëndësi të madhe në aspektin ambiental e mjedisor, e që tani ndërlidhet edhe me Prishtinën e premtuar nga Rama dhe me të njejtin nuk duhet të bëhen gabimet që janë bërë me projektin e “Rrugës B”.
“Formimi i një lumi përgjatë kësaj rruge me trajtimin e duhur të ujërave të zeza dhe atmosferik ka një vlerë shumë të madhe në këtë aspekt. Është e rrugës që të mos bëhen gabimet e njëjta siç janë bërë në projektin e Rrugës B, me mos trajtimin e duhur të niveletës e as ujërave atmosferike, me të cilat sot e asaj dite kjo rrugë ka gjithnjë probleme. Të njëjtat gabime janë bërë edhe me mos trajtimin e duhur të lumit Prishtevka dhe Vellusha, duke shndërruar Prishtinën në kryeqytet pa lum”, shtoi Sadikaj.
Sipas një kontrate që kompania IfraPlus Sh.P.K ka pasur qysh nga viti 2011 ka vazhduar projektimin e “Rrugës A”, projekte të cilat nuk arritën të përfundojnë si shkak i mos bashkëpunimit dhe koordinimit me autoritet e Komunës së Prishtinës.
“Kompania projektuese INFRA PLUS Sh.P.K pjesë e të cilës jam edhe unë, ka vazhduar me projektimin e kësaj rruge duke e ditur se kemi pasur një kontratë projektimi qysh në vitin 2011 por që nuk arriti të përfundohej asnjëherë si shkak i mos bashkëpunimit dhe koordinimit me autoritet e Komunës së Prishtinës. Pavarësisht kësaj në vitin 2021 në koordinim me stafin teknik të Komunës së Prishtinës arritëm të kemi një bashkëpunim shumë të mirë që dha rezultat edhe përfundimin e këtij projekti me gjatësi totale L = 5,900.00 m”, ka shkruar drejtori teknik i InfraPlus.
Sadikaj gjithashtu ka shprehur një çasje pozitive sa i përket reflektimit të z.Rama duke shpresuar se i njejti do të jetë një kryetar për të cilin edhe u votua.
“I nderuar kryetar, kjo nuk besoj se është mënyra e duhur e fillimit të ridefinimit të qendrës dhe Prishtinës. Kryeqyteti ka nevojë për vendime të mëdha dhe vepra të mëdha, që të jetë kryeqyteti i përjetimeve e i jetueshëm për qytetarët. Shpresoj në reflektimin tuaj e mbetem me shpresë që do jeni kryetari për të cilin jeni votuar”, ishte thirrja e tyre. /GazetaDemos/
Postimi i plotë:
