Shemsi Krasniqi, i njohur në publik si “Shemi i Ilirëve” është arrestuar nga Policia gjatë ditës se djeshme në hapësirat ku po mbahet festivali “Sunny Hill” në Gërmi. Zyrtarët policorë e prangosën pasi fillimisht hasën në rezistencën e tij, që dyshohet se shpërfilli urdhrat e Policisë në momentin që s’u lejua të ngjitej në skenë për të kënduar.
Burimet e Sinjalit nga Prokuroria kanë bërë me dije se Shemin e zuri sherri me zyrtarët policorë fillimisht ditën e parë të festivalit, por që Policia arriti ta vë nën kontroll, pas tentativave të tij, përkundër që s’kishte as biletë e as ftesë për të kënduar. Situata më 4 gusht u vu nën kontroll dhe ndaj tij u ndërmorën veprime në bazë të ligjit për rendin dhe qetësinë publike.
Por siç duket ai nuk u mjaftua me kaq dhe pas dy ditësh, më 6 gusht ai ia mësyu sërish festivalit, por këtë herë përfundoi në pranga të Policisë.
Shemi po dyshohet se gjatë ditës së djeshme kishte shkuar në Gërmi me automjet, duke mos zbatuar urdhrat e Policisë për t’u ndaluar derisa zyrtarët policorë intervenuan dhe e larguan nga ajo zonë. Thirrjet e policëve siç duket hasën në vesh të shurdhër, pasi nuk shkoi gjatë dhe Shemi u shfaq sërish te hyrja, ku përsëri tentoi të futej.
Këtë herë, sherri plasi me të madhe, pasi ai dyshohet se shtyu policët dhe në çdo formë, edhe me forcë, tentoi disa herë të futej në binën e festivalit për të kënduar.
Sinjali mëson se me Shemin, Policia ka negociuar gjatë, disa herë është lutur të mos prish rendin dhe qetësinë, duke ia bërë me dije se është organizatori ai që i përcakton rregullat e festivalit dhe Policia është aty vetëm për të ofruar siguri për pjesëmarrësit.
Por përkundër kësaj, ndonëse së paku dy herë ka hyrë me veturë poshtë laurës, ai sërish kishte insistuar të futej në këmbë duke shpërfillur urdhrat e Policisë dhe rregullat e festivalit.
Shemit nuk i doli telashe vetëm me Policinë, pati konflikt edhe me sigurimin e festivalit, ku domosdoshmërisht u kërkua ndërhyrja e Policisë për ta vënë situatën nën kontroll, me ç’rast ai u arrestua dhe u shoqërua në stacion policor për procedura të mëtejshme.
Në anën tjetër, për arrestimin e tij, ka reaguar edhe vet Shemi, përmes një postimi në Facebook, për shkak se kishte dhënë fjalën se do të performonte, ndonëse i paftuar dhe pa leje të organizatorit.
Ai e ka fajësuar organizatorin dhe përgjegjësin e Policisë, por në asnjë moment nuk e pranon se ishte i paftuar, nuk kishte biletë dhe se paraprakisht kishte premtuar se do ta prish rendin e festivalit, duke performuar këngë që s’kishin aprovimin e organizatorit.
Kujtojmë se në festival jo të gjithë artistët që kanë hite kanë qenë të ftuar sepse ky është një organizim privat dhe varet nga ata që e organizojnë.
