Triumfi i PSG-së në finalen e Ligës së Kampionëve 2024/25 nuk ishte vetëm një sukses sportiv, por edhe një fitore e madhe financiare. Klubi parisien vendosi një rekord të ri të fitimeve në këtë kompeticion, duke arkëtuar plot 148.4 milionë euro nga pjesëmarrja dhe triumfi përfundimtar.
Përpara finales, PSG kishte kryesuar tabelën e të ardhurave me 137.9 milionë euro, vetëm pak përpara rivalëve të tyre të mbrëmjes, Interit, që kishte arritur në 136.6 milionë euro.
Fitorja me rezultat bindës 5-0 kundër gjigantëve italianë i solli PSG-së një shpërblim shtesë prej 6.5 milionë eurosh për triumfin në finale.
Përveç kësaj, PSG siguroi edhe 4 milionë euro të tjera për kualifikimin automatik në Superkupën e Evropës, duke e çuar totalin e fitimeve në shifrën rekord prej 148.4 milionë euro. Kjo e tejkalon rekordin e vendosur nga kampioni i vitit të kaluar, Real Madrid, që kishte grumbulluar 138.8 milionë euro.
Ky rezultat pasqyron jo vetëm fuqinë sportive të PSG-së, por edhe ndikimin e formatit të ri të UEFA-s për Ligën e Kampionëve, me 36 klube pjesëmarrëse dhe një fond çmimesh të rritur në 2.4 miliardë euro.
Investimet e PSG-së dhe performanca e shkëlqyer në këtë edicion e bënë klubin e parë që e kaloi këtë prag fitimesh, duke e kthyer fitoren e madhe në një sukses të dyfishtë – sportiv dhe ekonomik.
Me këtë rekord të ri, PSG jo vetëm që vulosi epërsinë e saj në futbollin evropian, por gjithashtu vendosi një standard të ri për fitimet në historinë e Ligës së Kampionëve.
