Presidenti i Rusisë, Vladimir Putin, ka thënë se nuk do të ketë luftëra të tjera pas asaj në Ukrainë, nëse vendi i tij trajtohet me respekt dhe se pretendimet që Moska është duke planifikuar të sulmojë vende evropiane janë “marrëzi”.
Në një konferencë të gjatë televizive që zgjati gati katër orë e gjysmë, ai u pyet nga Steve Rosenbergu i televizionit BBC nëse do të kishte “operacione speciale ushtarake” të reja – termi që Putini e përdor për luftën në Ukrainë.
“Nuk do të ketë asnjë operacion të ri, nëse ju [Perëndimi] na trajtoni ne [Rusinë] me respekt, nëse ju i respektoni interest tona njësoj siç jemi përpjekur ne gjithmonë t’i respektojmë tuajat” – tha kreu i Kremlinit.
Komentet e tij ishin në linjë me një deklaratë të bërë rishtazi, kur kishte thënë se Rusia nuk ishte duke planifikuar që të hynte në luftë, por se ishte e gatshme “mu tani”, nëse Evropa do të dëshironte.
Presidenti rus shtoi edhe një kusht për të mos filluar luftëra të tjera, siç u shpreh ai: “Nëse nuk na mashtroni siç na mashtruat me zgjerimin lindor të NATO-s.”
Putini u shfaq në konferencën vjetore të quajtur “Linja e Drejtpërdrejtë”, ku pranoi pyetje nga publiku dhe gazetarët. Në prapafijë kishte një hartë të madhe të Rusisë që i përfshinte edhe territoret e pushtuara të Ukrainës, përfshirë Gadishullin e Krimesë.
Televizioni shtetëror rus pretendoi se më shumë se tre milionë pyetje ishin dorëzuar për presidentin e vendit.
Putini foli edhe për ekonominë që po përballet me problem shkaku i rritjes së dobët, ngritjes së çmimeve dhe rritjes së TVSh-së nga 20 në 22 për qind më 1 janar.
Ai përsëri pretendoi se është i gatshëm për t’i dhënë fund luftës në Ukrainë “në mënyrë paqësore”, por dha pak shenja kompromisi.
