Paneli Zgjedhor për Ankesa dhe Parashtresaka aprovuar ankesën e subjektit politik Lista Serbe dhe ka ndryshuar vendimin e Komisionit Qendror të Zgjedhjeve, duke vendosur që lista me 33 kandidatë të certifikohet për pjesëmarrje në Zgjedhjet e Parakohshme për Kuvendin e Kosovës, të planifikuara për 28 dhjetor 2025.
Vendimi është marrë në seancën e panelit më 13.12.2025, nga një trupë treanëtarëshe e përbërë nga Kymete Kicaj (kryesuese), Skender Çocaj dhe Arsim Hamza.
Çfarë kishte ndodhur në KQZ dhe pse u kontestua
Sipas arsyetimit të vendimit, Lista Serbe e kundërshtoi vendimin e KQZ-së të datës 10.12.2025 (Nr. Protokolli 01/3771-2025), me të cilin nuk ishte certifikuar lista e kandidatëve. Në prapavijë, Zyra për Regjistrim, Certifikim dhe Kontroll Financiar të Subjekteve Politike brenda KQZ-së kishte dhënë rekomandim pozitiv për certifikimin e listës, pas verifikimeve për përmbushjen e kritereve ligjore (përfshirë kriteret e nenit 30 të LZP-së).
Megjithatë, në mbledhjen e KQZ-së, rekomandimi nuk arriti pragun e nevojshëm të votave: u shënua 3 vota “për”, 2 “kundër” dhe 6 abstenime, duke mos e kaluar kërkesën për shumicë të kualifikuar (2/3) që KQZ e trajtoi si kusht për certifikim. Kjo çoi në refuzimin e certifikimit.
PZAP nuk e pranoi logjikën që, në mungesë të shumicës së kualifikuar, refuzimi të konsiderohet “automatikisht” i qëndrueshëm pa një arsyetim substancial. Në vlerësimin e panelit:
- KQZ kishte përcaktuar vetë planin dhe afatet, ndërsa subjekti politik, sipas dosjes, i kishte respektuar afatet dhe kishte përmbyllur aplikimin brenda periudhës së paraparë.
- Rekomandimi profesional i zyrës kompetentebrenda KQZ-së kishte konstatuar se ishin përmbushur kushtet ligjore për certifikim, por KQZ e refuzoi certifikimin pa dhënë “arsye të vlefshme ligjore”.
- PZAP thekson se vendimi i KQZ-së nuk ofron arsyetim pse është refuzuar rekomandimi i zyrës kompetente dhe nuk përmban trajtim të fakteve vendimtare në raport me kriteret ligjore dhe rregulloren për certifikim; në këtë formë, paneli e konsideron vendimin të mangët dhe të paqëndrueshëm juridikisht.
