Qendra për Hulumtim, Transparencë dhe Përgjegjësi (CRTA) njoftoi se në 10 muaj të këtij viti, presidenti i Serbisë, Aleksandar Vuçiq, ka folur 248 herë përmes televizioneve me mbulim kombëtar.
Aleksandar Vuçiq ka folur më së shumti në prill, deri në 32 herë, ndërsa në mars ka folur 30 herë.
Fjalimet më të pakta të Vuçiqit ishin në janar, kur foli 17 herë.
Kujtojmë se vetëm në ditët e fundit Vuçiq u shfaq për herë të parë të mërkurën e kaluar në Radio Televizionin Serb në Dnevnik 2, ndërsa të premten iu drejtua televizionit kombëtar të përditshëm Pink.
Vuçiq të dielën ishte i ftuar në Tv Prva, ndërsa mbrëmë i ftuar në emisionin shumëorësh “Çirilica” në Tv Happy.
Bie fjala, interesant është edhe fakti se Vuçiq tashmë në fillim të tetorit ka qenë i ftuar në “Çirilica” dhe po atë ditë para atij emisioni ka dhënë një intervistë për CNN.
Në fund të tetorit të këtij viti, Byroja për Hulumtime Sociale (BIRODI) njoftoi se në 10 muaj e gjysmë, presidenti i Serbisë, Aleksandar Vuçiq, ishte më shumë se 14 herë më i përfaqësuar se e gjithë opozita në Dnevnik 2, në radiotelevizionin serb.
Sipas rezultateve të monitorimit të raportimit në Dnevnik 2 të RTS, të cilin BIRODI e zhvillon që nga dhjetori i vitit 2022, presidenti Vuçiq ka qenë i pranishëm për 10 orë 32 minuta e 1 sekondë në periudhën nga 1 dhjetori 2022 deri më 15 tetor 2023, që është mesatarisht 25 për qind e kohës së të gjithë akterëve të vëzhguar.
“Kjo është 14 herë më shumë se përfaqësuesit e opozitës që kanë qenë të pranishëm për 44 minuta e 15 sekonda në të njëjtën kohë, që është 1.6 për qind e kohës totale të të gjithë aktorëve të vëzhguar”, thuhet në një deklaratë të BIRODI.
