Një lojë shpërblyese e organizuar me bujë të madhe në Gjilan ka përfunduar në dyert e gjykatës, vetëm pak orë para se të shpallej emri i fituesit të madh.
Gazeta Insajderi ka siguruar një aktvendim të Gjykatës Themelore në Gjilan, i cili ka goditur planet e qendrës tregtare “Grande Calabria” SH.P.K në Gjilan. Përmes një vendimi, gjykata ka urdhëruar bllokimin e shortit për çmimin kryesor – një veturë e kuqe e tipit “Citroen C3”, me zero kilometra, e cila ishte planifikuar të dhurohej sot, më 8 korrik, në orën 14:00.
Krejt kjo ka ndodhur pas padisë së ngritur nga një qytetare e Gjilanit.
Ajo ka vënë në lëvizje organet e drejtësisë duke pretenduar se kompania po shkel premtimin për shpërblim në lojën “Blej në Grande Mall dhe fito”. Sipas saj, ajo ishte fituesja e këtij çmimi.
Çmimi përfshinte një veturë të re të tipit “Citroen C3”, me ngjyrë të kuqe dhe me 00 kilometra. Kjo veturë ishte planifikuar të jepej sot.
Kompania “Grande Calabria” kishte caktuar që shpallja e fituesit të bëhej pikërisht me datë 8 korrik 2026, duke filluar nga ora 14:00.
Në aktvendim shpjegohet se gjykata është bazuar në Ligjin për Procedurën Kontestimore (nenet 297 dhe 306). Ky ligj thotë se kur ka rrezik që një biznes mund ta fshehë, ta shesë, ta falë apo t’ia japë dikujt tjetër një pasuri (në këtë rast makinën), gjykata duhet të ndërhyjë për ta ndaluar.
“Aprovohet i bazuar propozimi për caktimin e masës së përkohshme të sigurisë të paditëses dhe caktohet masa e përkoshme, ashtu që i ndalohet kundërshtarit të masës “Grande Calabria SH.P.K”, mbajta e organizimit më datë 08.07.2026, me fillim në ora 14:00 për shpalljen e fituesit të çmimit kryesor të lojës shpërblyese “Blej në Grande Mall dhe fito”, vetura Citroen C3 me ngjyrë të kuqe, 00 km”, thuhet në vendim.
Në aktvendim thuhet se masa e përkohshme do të mbetet në fuqi deri në përfundimin e kontestit me vendim të formës së prerë ose deri në një vendim tjetër të gjykatës.
Kompania dje ka dalë me një reagim, ku thotë se gjatë verifikimit të fituesve të lojës shpërblyese, është konstatuar se ankuesja ka rezultuar të jetë staf i një lokali që operon brenda “Grande Mall Calabria” dhe për këtë s’ka pasur të drejtë pjesëmarrjeje.
“… ka keqpërdorur jo 1 herë (sipas deklaratës së saj të cekur edhe në fotot në vijim) por pas verifikimit, është konstatuar se ajo ka keqpërdorur edhe 12 herë të tjera kuponat të cilët kanë qenë të dedikuar për konsumatorë që kanë blerë në Caramell Kids dhe nuk ia ka dhuruar ato konsumatorit, duke ia mohuar të drejtën të jetë pjesëmarrës në lojë shpërblyese. Labinota ka tentuar të përfitoj nga blerjet konsumatorit, duke plotësuar kuponat e tyre me të dhënat e saj personale, gjë që ka qenë e ndaluar sipas rregullores së lojës shpërblyese”, thuhet ndër të tjera në reagimin e kompanisë. /Insajderi.org/
