Lideri i Vetëvendosjes Albin Kurti e ka çuar letrën e katërt (aq sa janë bërë publike), në adresë të partive politike që prej se vendi përmbylli procesin zgjedhor. Për dallim prej letrës së parë që ia shkroi më 6 prill kreut të LDK’së Lumir Abdixhiku, ku i kërkonte takim për tu konsultuar, një muaj më vonë ai propozoi që VV dhe LDK të lidhin koalicion. Pa hyrë në detaje, Kurti i tha të parit të LDK’së se do të ishte më mirë “të takoheshim e të flasim”. Abdixhiku që tashmë e ka refuzuar një herë Kurtin, gazetarëve iu tha “keni durim, qëndrimet e LDK’së tashmë dihen”. Në fund të prillit lideri i VV’së u kishte kërkuar takim të përbashkët Krasniqit dhe Abdixhikut, por vetëm kreu i PDK’së kishte shkuar në takim.
Albin Kurti i ka parë nga rreshti i parë i ulëseve të Kuvendit të Kosovës dështimet e tij dhe të Vetëvendosjes për të gjetur numra për zgjedhjen e kryetares së parlamentit, kandidates së përzgjedhur, Albulena Haxhiut, e rrjedhimisht për ta përmbyllur konstituimin e Kuvendit të Kosovës të dalë nga zgjedhjet e 9 shkurtit.
Për t’i dhënë fund skenave ku Albulena Haxhiu në mënyrë të përsëritur nuk siguron numrin e kërkuar të votave për kryeparlamentare, Kurti u kujtua që votimi të bëhet në mënyrë të fshehtë.
As për këtë nuk gjeti numra pasi partitë tjera dhe shoqëria civile jashtë i thanë se procedura e votimit nuk mund të ndryshohet në “mes” të procesit. Refuzimi i kësaj përpjekje që u vu në rend ditë nga Kryesuesi i VV’së Avni Dehari (i dirigjuar nga partia) u evitua edhe kandidatura e Albulena Haxhiut e cila tash e tre seanca nuk po propozohet pasi ajo po ndërpritet sapo po dështon formimi i Komisionit për votim të fshehtë.
Por, si duket Kurti nuk ka ngelur vetëm duke vëzhguar. Sipas të gjitha gjasave, duke i befasuar edhe deputetët e tij, ai të hënën ka nxjerrë një letër që e ka dërguar në adresë të kreut të LDK’së Lumir Abdixhikut.
Abdixhiku, një herë tashmë e ka refuzuar Kurtin.
Për dallim nga letra e fundit ku Kurti donte vetëm konsultime, këtë herë, ai doli drejt në temë. I kërkoi koalicion LDK’së, të cilën vetëm pak muaj më parë e përjashtonte teksa u fliste mbështeëtsve.”O për zotin qetash as 5 orë nuk mundet me zgjatë. Kështu që na s‘bojmë koalicion me ta”.
Por, kjo deklaratë zgjedhore duket kapitull i mbyllur për kreun e VV’së. Pse të mos e bëjmë pyet Kurti në letër.
“Jam i bindur që votuesit e LDK-së sot e preferojnë më së shumti koalicionin me LVV. Edhe votuesit e LVV e preferojnë po ashtu më së shumti koalicionin me LDK” shton ai.
Pastaj, në mënyrë djallëzore Kurti i kujton kreut të LDK’së koalicionet që i lidhte dikur me kundërshtarë.
“Mosapajtimet e diferencat që mund të ketë LDK me LVV sot nuk janë më të mëdha sesa që LDK i kishte para koalicioneve të mëhershme kur i bëri ato. Plus, në vitin 2020 ne bashkë kemi qenë kolegë në Kurti 1, kur unë nuk kam pasur probleme me juve, por me disa të tjerë që nuk kanë më pozita të larta e as ndikim të madh në LDK si asokohe”.
Për të gjitha këto, Kurti do që të shihet me Abdixhikun sy më sy.
“Natyrisht që më së miri do të ishte të takohemi e t’i flasim dhe t’i diskutojmë këto si politikanë të pjekur që kanë ardhmërinë e shtetit dhe përparimin shoqëror prioritet mbi çdo tjetër”.
Kreu i LDK’së më 8 prill e kishte refuzuar ftesën e parë të Kurtit për konsultime duke ia kujtuar gjuhën dhe qasjen ndaj rivalëve.
“Sado që unë dhe LDK nuk udhëhiqemi nga inati; sado që ne besojmë në dialog, bashkëpunim e komunikim njerëzor e politik; një takim i tillë – madje edhe konsultativ – do të ishte kapërcim fatal i dinjitetit njerëzor dhe politik.
Mes ‘hajvanatit’, ‘mbytjes së LDK-së’, ‘bashkëpunëtorëve të Serbisë’, mes moçalit të madh të pështymave ndaj nesh – unë, LDK dhe votuesit tanë – nuk e gjejmë veten as për konsultim”, kishte shkruar ai.
Abdixhiku premtoi përgjigje me kohë edhe ndaj ftesës së dytë të Kurtit, që erdhi me ofertë për koalicion.
Por, në letrën e kreut të VV’së figuroi edhe ky formulim.
“Deputetë të LDK-së së fundmi kanë deklaruar publikisht se për të ecur përpara në legjislaturën e nëntë, fillimisht me konstituimin e Kuvendit, nevojitet marrëveshje politike”, shkroi Kurti.
Abdixhiku tha se përgjigja zyrtare do të jetë ashtu siç i takon një partie.
“Më lejoni që të shkojë në zyrë ta shoh letrën, do të kthej përgjigje me kohë. I lus njerëzit tanë që gjendjen e tanishme ta trajtojnë pa arrogancë shumë. Do të kemi përgjigje zyrtare siç i takon një partie”, tha ai.
Në një përgjigje tjetër për media që erdhi të hënën gjatë ditës ai sinjalizoi se përgjigja do të mund të jetë negative.
“Pritni. Keni durim. Do të jem transparent si çdoherë tjetër. Qëndrimet e LDK-së tashmë i dini”,
Zyrtarë të Vetëvendosjes kanë pranuar publikisht se Kurti ka negociuar me Fatmir Limajn për koalicion por duket se kërkesa për postin e kryetarit të Parlamentit, që flitet se Limaj ia ka kërkuar ka qenë shumë e madhe për të.
Kurti ka refuzuar të flasë për çështjen e koalicioneve dhe negociatave për to.
Sa herë që ka kaluar afër gazetarëve me gjakftohtësi ka refuzuar të përgjigjet.
“Së pari Kuvendi, pastaj qeveria”, ishte njëra nga përgjigjet e tij të rralla dhe pa ndonjë përmbajtje rreth kësaj teme.
