Qytetari që u përplas me deputeten e Lëvizjes Vetëvendosje, Fitore Pacolli, në një lokal në Prishtinë, është liruar në procedurë të rregullt, pasi u intervistua nga Policia në cilësinë e të dyshuarit për kanosje.
Ngjarja ndodhi pasi ai iu afrua tavolinës ku po qëndronte deputetja dhe i ofroi të paguante faturën e saj, duke e akuzuar publikisht për korrupsion.
“Duhet me të ardhë marre që po e vjedh Kosovën. A të kujtohet kur i thojshje hajna, tash i ke ba miliardat”, dëgjohet duke thënë qytetari në një video që qarkulloi gjerësisht në rrjete sociale.
Insajderi merr vesh se pas incidentit, Pacolli e ka denoncuar rastin në Polici, duke pretenduar se është kanosur.
Qytetari është intervistuar si i dyshuar për këtë vepër penale, por Prokuroria ka konstatuar se nuk ka bazë për ndalim dhe ka vendosur lirimin e tij në procedurë të rregullt.
