Kryetari i Listës Serbe, Goran Rakiq, ka deklaruar se kërkesë e kësaj partie ka qenë tërheqja e 100 për qind të pjesëtarëve të Policisë së Kosovës nga komunat veriore, ka thënë se nuk e di nëse do të garojnë në zgjedhjet e ardhshme lokale.
Gazetarja Fetije Kamberi e cila ka folur me të prapa kamerave, pasi Rakiq kishte refuzuar të deklarohet para kamerës, ka thënë se kërkesë e Listës Serbe ka qenë tërheqja e plotë e Policisë së Kosovës nga komunat me shumicë serbe dhe jo vetëm 25 për qind.
Kamberi tha se Rakiq po qëndron së bashku me protestuesit serbë në Zveçan që nga mëngjesi i së mërkurës, ku po qëndrojnë numër i vogël i protestuesve.
Protesta në tri komunat veriore: Zveçan, Leposaviq e Zubin Potok ka filluar më 26 maj, duke kundërshtuar fillimin e punës së kryetarëve shqiptarë në këto komuna të banuara kryesisht me komunitetin serb në Kosovë.
Një ditë më parë Qeveria e Kosovës mori vendim për shtensionim të situatës në këto komunë duke tërhequr 25 për qind të pjesëtarëve të Policisë së Kosovës.
Mirëpo, këtë vendim të Qeverisë nuk po e pranon Lista Serbe si kusht për të marrë pjesë në zgjedhjet e jashtëzakonshme që pritet të organizohen në këto komuna./Teve1
