Avokatja e licencuar Blinera Osmani ka reaguar ashpër ndaj raportimit të gazetës Nacionales se ajo mori lincensen e avokatës pa i plotësuar kriteret ligjore të përcaktuara nga Oda e Avokatëve të Kosovës.
Në një reagim në Facebook, Osmani e ka cilësuar publikimin si “tregim shpifës, tendencioz dhe keqinterpretues”, të motivuar – sipas saj – “politikisht”.
“Portali “Nacionale” ka publikuar sot një video tregim shpifës, tendencioz dhe keqinterpretues, që synon të njollosë integritetin tim profesional si avokate e licencuar në Republikën e Kosovës. Në mënyrë krejtësisht të pavërtetë, portali pretendon se unë paskam marrë licencën pa i plotësuar kriteret ligjore, një akuzë absolutisht e rreme dhe e motivuar politikisht.” – shkroi Osmani ndër të tjera.
Osmani mohoi çdo shkelje të procedurave të licencimit, duke pretenduar se gjithçka është bërë “në përputhje të plotë me Ligjin për Avokatinë dhe rregulloret e Odës së Avokatëve të Kosovës.”
“Licencimi im si avokate është bërë në përputhje të plotë me Ligjin për Avokatinë dhe rregulloret e Odës së Avokatëve të Kosovës, e cila ka konfirmuar zyrtarisht ligjshmërinë e procesit dhe plotësimin e të gjitha kritereve të licencimit. Çdo insinuatë ndryshe është spekulim i qëllimshëm për të dëmtuar reputacionin tim dhe për të hedhur baltë mbi institucionet profesionale të vendit.” – shkroi ajo më tej.
Osmani e vazhdoi reagimin me gjuhë të ashpër dhe sulme ndaj mediave.
Çka raportoi Nacionale?
Për licencim si avokat në Kosovë kërkohet domosdoshmërisht Deklarata/Vërtetimi i Papunësisë, dokument që lëshohet nga Agjencia e Punësimit. Nacionale raportoi se Blinera Osmani nuk e kishte dorëzuar këtë dokument te Oda e Avokatëve.
Dokumentet e siguruara nga Nacionale dëshmuan se në korrik 2023, Agjencia e Punësimit ia ka refuzuar kërkesën Osmanit për vërtetim papunësie, pasi ajo figurohej si pronare/drejtuese në disa biznese aktive dhe kishte përfituar pagë deri në qershor 2023.
Pavarësisht refuzimit, Osmani figuron e licencuar dhe ushtron profesionin si avokate. Oda e Avokatëve nuk ka dhënë sqarime se si është lëshuar licenca pa dokumentin e detyrueshëm.
Lexojeni raportimin e plotë:
