Presidentja e Kosovës, Vjosa Osmani, ka publikuar pamje nga “Darka e Lamës” që këtë vit u mbajt në kampin e Policisë “Enver Zymeri” në Mitrovicë. Disa media raportuan se Njësia Speciale Intervenuese që e kreu aksionin në Banjskë, e ka bojkotuar këtë darkë.
Gazeta Sinjali ka kontaktuar Presidencën lidhur me këtë çështje, por që e kanë mohuar një gjë të tillë.
Këshilltar për media, Bekim Kupina, ka thënë shkurt se “nuk është e vërtetë, duke deklaruar se në foto shihet komandanti i tyre.
Ndryshe, sipas raportimeve, bojkoti i kësaj njësie ka ndodhur pasi nuk janë plotësuar kërkesat e tyre, sidomos ajo për pagesën e rrezikshmërisë.
Ndërsa në postimin e Osmanit, thuhet se pjesë e darkës ishte edhe familja e Afrim Bunjakut.
“Këtë vit festën e lashtë shqiptare, Darkën e Lamës, e shënuam bashkë me Policinë e Republikës së Kosovës, në kampin “Enver Zymeri”, në Mitrovicë, në shenjë mirënjohjeje, vlerësimi e falënderimi për gra e burra në uniformë, të cilët shërbejnë pa u lodhur për të na bërë të ndihemi të sigurtë.
Në prani edhe të familjeve të policëve që kanë rënë në detyrë, përfshirë familjen e heroit Afrim Bunjaku, shprehëm mirënjohjen më të thellë të të gjithë qytetarëve të Republikës për ata që dhanë jetën në mbrojtje të çdo pëllëmbe të territorit të vendit tonë.”.
