Nënkryetarja e Kuvendit të Kosovës, Albulena Haxhiu, në një konferencë të mbajtur për media, ka thënë se deputetët e Listës Serbe s’mund ta mbajnë të bllokuar në asnjë mënyrë Kuvendin dhe se puna duhet të vazhdohet tutje.
Sipas Haxhiut, është puna e Kushtetueses që të sigurohet për një gjë të tillë, që një parti që s’e njeh shtetin e Kosovës të mos mund të shkaktojë bllokada.
“Ky përfaqësim nuk duhet të shndërrohet në instrument bllokade apo mjet të privilegjuar për një grup politik që kundërshton rendin tonë kushtetues”, ka thënë Haxhiu.
Ish-ministrja ka thënë se një gjë e tillë duhet të bëhet në mënyrë specifike për një parti si Lista Serbe, meqë ndryshe është puna me serbët që e njohin shtetin e Kosovës, siç është shembulli i Nenad Rashiqit.
“Institucionet, përfshirë Kuvendin dhe Kushtetuesen kanë përgjegjësi që të sigurojnë se asnjë subjekt politik, veçanërisht nga komuniteti serb që s’e njeh shtetin, si në këtë rast Lista Serbe, sepse ndryshe e kemi situatën me serb që e njohin Republikën e Kosovës, deputetin Nenad Rashiq”, ka thënë Haxhiu.
Ndonëse LVV dhe Kurti e konsiderojnë të veçantë Rashiqin dhe kanë bashkëpunuar përgjatë viteve të fundit, vetë politikani serb nuk është në një linjë me partinë e Kurtit kur vjen puna tek konstituimi i Kuvendit të Kosovës, gjë të cilën kryetari Dimal Basha e konsideron si punë të kryer.
Rashiq në deklarimet e tij e konsideron se Kuvendi i Kosovës nuk është konstituuar, meqë s’është zgjedhur edhe nënkryetari i fundit nga radhët e komunitetit serb.
“Nuk kam pritë – me çdo respekt ndaj kryetarit Basha, që do të konstatojë atë ditë Kuvendin, sepse sipas meje nuk është konstituuar dhe duhet të presim një vendim të Gjykatës Kushtetuese,” kishte thënë Nenad Rashiq në një intervistë për T7.
