Veriu.info javën e kaluar ka publikuar një hulumtim, duke u thirrur në informata nga një burim anonym, ku tregohet për nisjen e procedurave hetimore ndaj kompanisë “Green Med L.L.C.” për parregullsi të mundshme në dokumentacionin e importit të produkteve estetike. Po ashtu në shkrim I është vëmendje edhe raportit familjar mes inpektores shëndetësore Diana Shehu Devaja dhe djalit të saj Ardit Devaja, pronarit të kompanisë “Green Med L.L.C.”, pasi që kemi marrë denoncime për konflikt interesi të inspektores për shkak të aktivitetit afarist të djalit të saj.
Ndaj këtij artikulli ka reaguar avokatja Blinera Osmani si përfaqësuese ligjore në emër të “Green Med”, Ardit Devaja dhe Diana Shehu Devaja, duke thënë publikimi përmban pretendime të pabazuara, insinuate dhe sugjerime tendencioze, gjë që nuk është aspak e vërtetë.
Veriu.info i është përgjigjes pikë për pikë reagimit të avokates së të “Green Med”, Ardit Devaja dhe Diana Shehu Devaja, përgjigje të cilën e gjeni në pjesë e poshtë të këtij artikulli.
Artikulli hulumtues: https://veriu.info/inteligjenca-e-doganes-nis-hetimet-ndaj-green-med-nena-inspektore-ne-shendetesi-i-biri-biznes-me-produkte-medicinale/
Reagimi i plotë i avokates në emër të apostrofuarve:
Publikimi në fjalë përmban pretendime të pabazuara, insinuata dhe sugjerime tendencioze, të cilat janë paraqitur si fakte, pa u mbështetur në asnjë dokument zyrtar, vendim të autoritetit kompetent apo burim të verifikueshëm. Një qasje e tillë përbën shkelje të rëndë të parimeve themelore të informimit korrekt dhe të së drejtës për mbrojtje të reputacionit.
Në mënyrë të veçantë, hedhim poshtë kategorikisht pretendimet dhe insinuatat se gjoja ekzistojnë parregullsi në dokumentacionin e importit të produkteve estetike të kompanisë, të cilat në mënyrë tendencioze lidhen me marrëdhënie familjare. Këto pretendime janë tërësisht të pabazuara, të pavërteta dhe spekulative, dhe synojnë ekskluzivisht dëmtimin e reputacionit të kompanisë dhe të personave të përmendur. Për sqarim të plotë të publikut, znj. Diana Shehu Devaja nuk mban asnjë funksion, pozitë apo rol në Doganën e Kosovës, nuk ka asnjë kompetencë ligjore, kapacitet institucional apo formë ndikimi në procedurat doganore apo të importit, dhe nuk ka qenë kurrë e përfshirë, drejtpërdrejt apo tërthorazi, në procese të tilla. Po ashtu, çdo përpjekje për të ndërlidhur pozitën e saj në inspektoratin shëndetësor me veprimtarinë e kompanisë është tërësisht e pabazuar, hipotetike dhe keqdashëse, për faktin se kompania nuk ofron shërbime shëndetësore, por ushtron veprimtari të ligjshme si importuese e produkteve estetike, në përputhje të plotë me legjislacionin në fuqi.
Tutje, mënyra e ndërtimit të këtij publikimi, pa fakte, pa dokumente dhe pa burime të verifikueshme, krijon dyshimin e arsyeshëm se një lajm i tillë është publikuar me qëllim të dëmtimit të pozitës tregtare të kompanisë, duke i shërbyer interesave të palëve të treta, përfshirë konkurrencën, përmes përhapjes së informacioneve të rreme dhe tendencave dashakeqe.
Publikime të tilla, të porositura ose të ndikuara nga interesa private, përbëjnë shkelje të rëndë të etikës profesionale dhe të standardeve ligjore të informimit. Për sqarim të plotë të publikut, theksojmë se Kompania ushtron veprimtarinë e saj në përputhje të plotë me autorizimet ligjore dhe licencat përkatëse, të lëshuara nga institucionet kompetente, duke respektuar në mënyrë të vazhdueshme të gjitha detyrimet ligjore dhe rregullative, si në aspektin administrativ ashtu edhe në atë tatimor dhe inspektues. Asnjëherë nuk është shqiptuar ndaj kompanisë asnjë vërejtje, masë ndëshkuese apo sanksion nga autoritetet përkatëse, fakt ky i verifikueshëm në çdo moment. Rrjedhimisht, pretendimet për “hetim” janë të paqarta, të paformalizuara dhe nuk mbështeten në asnjë akt zyrtar, duke e bërë publikimin spekulativ dhe shpifës.
Tutje, theksojmë se përmes publikimit të dokumenteve që përmbajnë informacione konfidenciale dhe sekrete tregtare të kompanisë, të cilat janë në posedim ekskluziv të Doganës së Kosovës dhe nuk janë bërë publike përmes asnjë procedure ligjore apo kërkese për qasje në dokumente zyrtare, ju keni cenuar rëndë sekretin tregtar dhe parimin e konfidencialitetit. Rrjedhimisht, një publikim i tillë përbën shkelje të dispozitave për mbrojtjen e sekretit tregtar dhe krijon bazë të plotë ligjore për ndërmarrjen e të gjitha masave të nevojshme ligjore, përfshirë procedurat civile dhe njoftimin e autoriteteve kompetente.
Publikimi i një lajmi të tillë, pa verifikim, pa dëgjim të palës dhe pa bazë dokumentare, përbën shkelje të drejtpërdrejtë të parimeve të Ligjit për Media, të Kodit të Etikës së Gazetarëve, si dhe të së drejtës kushtetuese për mbrojtjen e nderit dhe reputacionit, duke krijuar gjithashtu bazë për përgjegjësi civile për dëmin e shkaktuar. Për këto arsye, kërkojmë:
- Tërheqjen e menjëhershme të artikullit nga portali juaj;
- Publikimin e demantimit të plotë dhe të barasvlershëm në dukshmëri, ku të sqarohet se pretendimet janë të pavërteta dhe të pabazuara;
- Korrigjimin publik të informacionit të shpërndarë, duke reflektuar qëndrimin zyrtar të kompanisë.
Në rast se nuk veproni brenda një afati të arsyeshëm (48 orë), jemi të detyruar të ndërmarrim të gjitha veprimet ligjore në dispozicion, përfshirë padi për shpifje, dëm të reputacionit dhe publikim të rremë, si dhe njoftimin e organeve përkatëse rregullative për shkelje profesionale. Duke ju falënderuar paraprakisht, presim reagimin tuaj të menjëhershëm.
Përgjigja e Veriu.info përmes avokatit Taulant Ferizi ndaj “Green Med”, Ardit Devaja dhe Diana Shehu Devaja:
Lidhur me këtë çështje, fillimisht duhet të theksojmë se të gjitha pretendimet e ngritura në Demant, janë tërësisht të pambështetura në prova, janë të natyrës deklarative dhe përbëjnë kundërshtim sipërfaqësor të publikimit të Klientit.
Fillimisht, theksojmë se Klienti në asnjë moment nuk ka theksuar se znj. Diana Shehu-Devaja është e punësuar në cilësi të zyrtares publike pranë Doganës së Kosovës. Klienti, ka potencuar se e njëjta është pjesë e Inspektoratit Shëndetësor të Ministrisë së Shëndetësisë. Në këtë linjë, Klienti ka pretenduar se znj. Shehu-Devaja ka ndikuar nga pozita e saj si Inspektore Shëndetësore, dhe jo nga pozita e saj si zyrtare e Doganës së Kosovës. Andaj, ky pretendim është i pakuptueshëm për Klientin.
Sa i përket faktit se “pretendimi për hetime është I paformalizuar, i paqartë dhe nuk mbështeten në asnjë akt zyrtar përbënë publik shpifës dhe spekulativ”, theksojmë se tërë boshti I publikimit është I mbështetur pikërisht në emailn e z. Senad Fetahoviç, Drejtor i Inteligjencës Doganore të Doganës së Kosovës, në të cilën theksohet “është duke u punuar intenzivisht dhe dhe rezultatet e hetimeve do të ju informojmë sa më shpejtë që është e mundur”.
Në këtë rast, emaili në fjalë përbënë dokument publik, pasiqë sipas Nenit 3, paragrafi 1, nënparagrafi 1.2, Ligjit Nr. 06/L-081 për Qasje në Dokumente Publike parashihet se: “Dokument Publik– nënkupton çdo akt, fakt apo informatë në formë elektronike apo me zë, formë të shtypur, në incizime vizuale apo audiovizuale të prodhuara apo mbajtura nga institucioni publik”.
Rrjedhimisht, është e qartë se publikimi nuk përbënë shpifje, por është publikim që mbrohet nga imunitetit. Sipas Nenit 9, të Ligjit Nr. 02/L-65 Civil kundër Shpifjes dhe Fyerjes parashihet se: “Deklaratat e dhëna nuk bartin përgjegjësi në bazë të këtij Ligji nëse i padituri dëshmon se ato janë bërë në cilën do nga rrethanat në vijim: një raportim i drejtë dhe i saktë i çdo materiali që përbën një dokument zyrtar, ku statusi i këtij dokumenti arsyeton përhapjen e materialit, siç janë dokumentet zyrtarë të dala nga një hetim publik, ose nga një gjykatë ose legjislacion i huaj; një raportim i drejtë dhe i saktë i punës ose dokumenteve zyrtare të punëve të pushtetit publik”.
Sa i përket publikimeve të dokumenteve konfidenciale, të cilat përbëjnë sekret tregtar/afarist të kompanisë, duhet të theksohet se dokumentet në fjalë, nuk përbëjnë sekret tregtar, pasiqë nuk janë të përcaktuar me ligj si të tilla. Sipas Ligjit Nr. 08/L-076 për Mbrojtjen e Sekreteve Tregtare parashihet se: “Çdo kërkesë për masat, procedurat dhe mjetet ligjore të përcaktuara me këtë ligj, do të hedhet poshtë kur marrja, përdorimi ose zbulimi i sekretit tregtar është kryer në ndonjë nga këto raste: 1.1. për ushtrimin e të drejtës së lirisë së shprehjes dhe informimit siç përcaktohet me Kushtetutë, duke përfshirë respektimin e lirisë dhe pluralizmit të mediave; 1.2. për zbulimin e sjelljes së pahijshme, keqbërjes ose veprimtarisë së paligjshme, me kusht që i padituri të ketë vepruar me qëllim të mbrojtjes së interesit të përgjithshëm publik”.
Në rastin konkret, qëllimi i Klientit ka qenë dhe mbetet mbrojtja e interesit të përgjithshëm, duke demaskuar veprimet të cilat i konsideron të kundërligjshme, e të gjitha këto, me anë të drejtës së lirisë së shprehjes dhe informimit, e cila i garantohet me kushtetutë.
Për më tepër, është e çuditshme se si nuk konstesohet fare përmbajtja e dokumentacionit, të cilin e konsideroni si sekret tregtar, por vetëm fakti se është “zbuluar” sekreti tregtar, e që tregon qartë se dokumentet në fjalë janë burimore, të pa-manipuluar dhe tërësisht kredibile.
Së fundi, duhet të theksohet, se Klienti është media e shkruar, e cila ka një set dispozitash të cilat nuk krijojnë detyrim për publikimin e demantit. Sipas Nenit IV, paragrafi 1 të Kodit të Mediave të Shkruara, parashihet se: “Është obligim i gazetarëve, redaktorëve dhe i gazetave, portaleve e agjensive të lajmeve që të botojnë reagime dhe/ose demante kur mediat publikojnë informata të pasakta për një individ apo organizatë”. Në rastin konkret, informatat e klientit janë informata të marra nga dokumentet publike dhe nuk janë të rrejshme apo nuk kanë për qëllim përhapjen e të dhënave shpifëse, qoftë për persona fizik apo juridik.
Poashtu, lidhur me afatin e dhënë prej 48 orësh, vlen të theksohet se Ligji Nr. 02/L-65 Civil kundër Shpifjes dhe Fyerjes parashihet se afati për demant është tetë (8) ditë, dhe jo 48 orë.
