Persona të panjohur i kanë vënë flakën një ekskavatori të kompanisë Eurondërtimi SH.P.K në Mitrovicë gjatë orëve të natës, kompanisë që po realizon rrënimet pa leje në këtë komunë në bazë të kontratave zyrtare me institucionet shtetërore.
Pas këtij akti të rëndë ka reaguar vet kompania Eurondërtimi SHPK përmes një komunikate, raporton Gazeta Online Veriu.info.
Kompania ka thënë se është djegur njëri nga ekskavatorë kyç të saj përmes një akti të rëndë kriminal, drejtuar ndaj pronës dhe makinerisë së tyre operacionale.
“Ky veprim i kalkuluar vjen në një periudhë kritike kur kompania jonë, në bazë të kontratave zyrtare dhe në bashkëpunim të ngushtë me institucionet komunale, po realizon procesin vital të rrënimit të objekteve pa leje në Mitrovicë, një proces i domosdoshëm për rivendosjen e ligjshmërisë dhe rregullit urbanistik.” – thuhet në reagim.
Kompania këtë akt e ka cilësuar si sfidë të drejtpërdrejtë dhe të rëndë ndaj autoritetit të shtetit dhe rendit juridik në Republikën e Kosovës.
EURONDERTIM SH.P.K. ka thënë se mbetete e palëkundur në angazhimin e saj profesional.
Komunikata e plotë:
KOMUNIKATË ZYRTARE MBI AKTIN KRIMINAL TË ZJARRVËNIES NDAJ ASETEVE TË KOMPANISË
Të nderuar qytetarë, përfaqësues të mediave dhe institucioneve,
Me përgjegjësi të plotë profesionale dhe qytetare, kompania EURONDERTIM SH.P.K. njofton opinionin publik mbi një akt të rëndë kriminal të ndodhur gjatë orëve të vona të mbrëmjes së kaluar, i drejtuar ndaj pronës dhe makinerisë sonë operacionale.
Persona të panjohur, përmes metodave subversive, i kanë vënë flakën qëllimisht njërit prej ekskavatorëve kyç të kompanisë sonë. Ky veprim i kalkuluar vjen në një periudhë kritike kur kompania jonë, në bazë të kontratave zyrtare dhe në bashkëpunim të ngushtë me institucionet komunale, po realizon procesin vital të rrënimit të objekteve pa leje në Mitrovicë, një proces i domosdoshëm për rivendosjen e ligjshmërisë dhe rregullit urbanistik.
Sot, vendin e ngjarjes e inspektoi Kryetari i Komunës së Mitrovicës, z. Faton Peci.
E vlerësojmë lart mbështetjen institucionale dhe dënimin e qartë që i është bërë këtij akti nga nivelet më të larta drejtuese.
Lidhur me autorët e këtij akti dhe pasojat ligjore:
Ky sulm nuk është thjesht një dëmtim material ndaj një subjekti privat. Duke marrë parasysh kontekstin e punës sonë aktuale, ky akt përbën një sfidë të drejtpërdrejtë dhe të rëndë ndaj autoritetit të shtetit dhe rendit juridik në Republikën e Kosovës. Sulmi ndaj operatorëve ekonomikë që zbatojnë vendimet e institucioneve shtetërore trajtohet me seriozitetin maksimal nga organet e drejtësisë.
Policia e Kosovës dhe njësitet e specializuara hetimore tashmë kanë mbledhur provat materiale nga vendi i ngjarjes dhe po analizojnë çdo detaj me kapacitet të plotë. Rrethi i hetimeve është zgjeruar dhe intensifikuar.
Ata individë apo grupe kriminale që qëndrojnë pas këtij akti duhet të jenë të vetëdijshëm për gravitetin e situatës në të cilën ndodhen. Identifikimi i tyre është vetëm çështje kohe. Përballja me forcën e plotë të ligjit dhe institucioneve të sigurisë do të jetë e pashmangshme dhe e pakompromis, duke mbartur sanksionet maksimale që parashikon Kodi Penal për vepra të tilla të rënda kundër rendit dhe sigurisë publike.
Asnjë akt burracak i kryer në errësirë nuk do të mbetet pa u ndriçuar nga drejtësia.
EURONDERTIM SH.P.K. mbetet e palëkundur në angazhimin e saj profesional. Ne do të vazhdojmë të përmbushim me përpikëri çdo obligim kontraktual dhe ligjor që kemi ndaj qytetit dhe institucioneve, duke u besuar plotësisht organeve kompetente për garantimin e sigurisë.
Me respekt,
Euro Ndertim SHPK
