Turqia, e cila e ka ushtrinë e dytë më të madhe në NATO pas Shteteve të Bashkuara, do të mund të kontribuonte në një mision të mundshëm paqeruajtës në Ukrainë, ka thënë një burim brenda Ministrisë së Mbrojtjes të Turqisë.
“Çështja e kontribuimit në një mision do të shqyrtohet, nëse vlerësohet si e nevojshme për vendosjen e stabilitetit rajonal dhe paqes dhe do të vlerësohet në mënyrë të përbashkët me të gjitha palët përkatëse” – iu tha ky burim gazetarëve në Ankara, raporton agjencia e lajmeve “Reuters”.
Fuqitë kryesore ushtarake të Evropës, Britania dhe Franca, tashmë e kanë diskutuar mundësinë e dislokimit të trupave në një forcë të mundshme për vëzhgimin e një armëpushimi në Ukrainë pas një pakti të paqes në të ardhmen, ndërsa Shtetet e Bashkuara kanë thënë se nuk do të dërgojnë ushtarë atje.
Ukraina thotë se çfarëdo marrëveshjeje e paqes do të kërkonte një forcë të fuqishme në terren për të ofruar garanci të sigurisë. Moska ka dalë kundër çfarëdo dislokimi të forcave të vendeve të NATO-s, edhe pse presidenti amerikan, Donald Trump, ka thënë se ai beson që Rusia mund të pajtohet me këtë ide.
Burimi turk, i cili kërkoi të mbetej anonim, tha se diskutimet për një dislokim të forcave turke mbetet konceptual dhe se nuk është marrë ende ndonjë vendim konkret.
“Koncepti ende nuk është përcaktuar qartazi” –shtoi burimi.
Nëse Turqia do të dislokonte trupa, burimi theksoi se së pari do të duhej të shpallej një armëpushim mes Ukrainës e Rusisë dhe në dislokimet fillestare do të duhej të përfshiheshin njësite joluftuese për ta vëzhguar armëpushimin.
Mediat turke raportuan javën e kaluar se presidenti i Turqisë, Rexhep Erdogan, kishte diskutuar një dislokim të mundshëm të trupave me homologun ukrainas, Volodymyr Zelensky, dhe me ministrin e Jashtëm të Rusisë, Sergei Lavrov, gjatë takimeve të ndara me ta në Ankara muajin e kaluar.
Turqia nuk është bërë pjesë e sanksioneve perëndimore kundër Rusisë dhe ka ndërmjetësuar marrëveshje në të kaluarën mes Kievit e Moskës, si marrëveshja për transportimin e drithit ukrainas nëpër Detin e Zi./Nacionale
