Grupi famëkeq “AlbKings”, i cili në vitin 2024 u bë një prej temave më të diskutuara në Kosovë për shkak të shpërndarjes së materialeve intime pa pëlqim, duket se është rikthyer sërish në Telegram.
Sinjali raporton duke cituar një sinjalizim nga një qytetar, i cili ka dërguar pamje të një grupi dhe kanali në Telegram me emrin “AlbKings”.
Nga pamjet e siguruara shihet se grupi aktualisht ka mbi 13 mijë anëtarë, ndërsa kanali i lidhur me të ka mbi 11 mijë abonentë. Në postimet e fundit, administruesit paralajmërojnë përmbajtje të reja që i cilësojnë si “VIP” dhe “Premium”.
Një prej postimeve thotë se po përgatitet një koleksion me “video & foto të ndryshme VIP”, materiale të vjetra e të reja, ndërsa në listën e emrave që përmenden nga administruesit janë Noizy, Enca, Don Xhoni, Xhensila Myrtezaj, Cozman dhe Tuna.
Në një tjetër postim, administruesit shkruajnë se bëhet fjalë për një grup “ekskluziv” me fotografi të personave të njohur dhe paralajmërojnë se përmbajtja e re do të publikohet “shumë shpejt”.
Madje, në një njoftim tjetër përdoret shprehja “PREMIUM VIP – SË SHPEJTI”, ndërsa ndjekësve u kërkohet të qëndrojnë në pritje për materialet e paralajmëruara.
