Procesi i rinumërimit të plotë të votave në Kosovë po shkon drejt fazës përfundimtare, ndërkohë që ndaj 23 personave është caktuar masa e paraburgimit nën dyshimet për manipulime serioze që kanë ngritur alarmin institucional. Sipas KQZ-së, deri të dielën, 25 janar 2026, në orën 10:00, janë rinumëruar 1,591 nga 2,557 vendvotime (mbi 62%) dhe procesi është përmbyllur plotësisht në 23 komuna.
Sipas përditësimit të fundit zyrtar, deri në orën 10:00 të së dielës (25 janar 2026), janë rinumëruar 1,591 nga 2,557 vendvotime. Kjo shifër përbën mbi 62% të totalit të paraparë, ndërsa procesi tashmë është përmbyllur plotësisht në 23 komuna.
“Në QNR rinumërohen 1,591 nga 2,557 vendvotime, procesi përmbyllet plotësisht në 23 komuna Në Qendrën e Numërimit dhe Rezultateve është duke vazhduar numërimi i fletëvotimeve sipas listës së vendvotimeve për të cilat KQZ ka marrë vendim që të rinumërohen. Nga fillimi i këtij procesi (e martë, 13 janar 2026, ora 18:00) dhe deri më tani (e diel, 25 janar 2026, ora 10:00) janë rinumëruar mbi 62% apo 1,591 nga 2,557 vendvotime”, njoftoi KQZ.
Nga “gabime teknike” në akuza për ryshfet, falsifikim e kanosje
Ajo që fillimisht u raportua si mospërputhje sporadike e votave, pas rinumërimit të pjesshëm u shpërfaq si një skemë e sofistikuar dhe masive e manipulimit. Të dhënat zyrtare të KQZ-së flasin për mbi 50,000 vota të tjetërsuara – të shtuara apo të hequra qëllimisht – gjatë fazës së parë të numërimit.
Kjo situatë çoi në një aksion të gjerë të Prokurorisë, duke rezultuar në arrestimin e 109 personave me urdhër të Kryeprokurorit të Prizrenit, Petrit Kryeziu. Në një deklaratë për media, Kryeziu zbuloi se keqpërdorimet mund të prekin deri në 60 mijë vota, duke sqaruar se manipulimi ka ndodhur brenda llojit – respektivisht mes kandidatëve të të njëjtit subjekt.
“Dua ta bëj të qartë se këtu nuk bëhet fjalë për numërimin e votive te subjekteve politike më 28 dhjetor, por bëhet fjalë për manipulime Brenda llojit, aty ku katër subjektet e mëdha politike, kanë dërguar të preferuarit e tyre dhe ata kanë menduar se larg syve të policisë dhe prokurorisë mund të manipulojnë dhe mund t’ia dalin pa të keqe. Mund të kuptoheshin gabimet e vogla të dhjetëra votave edhe pse KQZ nuk ka ndonjë marzhë tolerance. Këtu nuk bëhet fjalë as për dhjetëra as për qindar, por për mijëra vota të manipuluara dhe falsifikuara”, kishte deklaruar Kryeziu.
Përveç implikimeve penale, vonesat e shkaktuara nga ky rinumërim po rrezikojnë stabilitetin institucional të vendit. Eugen Cakolli nga Instituti Demokratik i Kosovës paralajmëroi së fundi se mos-certifikimi i rezultateve në kohë mund ta çojë Kosovën drejt zgjedhjeve të jashtëzakonshme.
Shqetësimi kryesor, sipas tij, mbetet tejkalimi i afateve kushtetuese për zgjedhjen e Presidentit.“Rreziku është që të hyjmë në muajin shkurt ose mars pa pasur rezultate të certifikuara dhe kjo mund të na nxjerrë jashtë afatit për zgjedhjen e presidentit”, ka thënë Cakolli në Tëvë1.
Sipas tij, nëse vendi mbetet pa Kuvend funksional dhe pa Qeveri brenda këtyre afateve, opsioni i vetëm kushtetues mbetet shpallja e zgjedhjeve të reja parlamentare.
