Së fundmi, kur dikush mund të ketë hamendësuar se ku është opozita, ka pasur shumë të ngjarë që ndonjëri nga liderët e partive opozitare, të lajmërohej nga zyra e Edi Ramës.
Vizita e fundit në zyrën e Kryeministrit Edi Rama ishte më e komentuara në media dhe opinionin publik kosovar. Dukej se pakkush kishte pritur që Ramush Haradinaj do t’i linte prapa përplasjet e ashpra me Ramën dhe padinë që ky i kishte ngritur, e ta takonte. Por, kreu i AAK-së nuk e prishi rendin. Shkoi te Rama, pasi delegacionet e PDK-së dhe LDK-së më parë e kishin kryer ritualin në Tiranë.
Rama në fakt po i pret në zyrën e tij liderët e partive opozitare kosovare me rend, siç janë në KQZ të rënditura nga zgjedhjet e fundit.
Të parin, në shkurt, e takoi kreun e PDK-së, Memli Krasniqin, i cili po shoqërohej me nënkryetarën Vlora Citaku, Uran Ismailin e Abelard Tahirin. Raportohej se ky takim po mbahej me ftesë të Kryeministrit Rama.
Për takimin, Krasniqi shkruante se me Ramën “Të dy u pajtuam për nevojën e një dinamike të re politike në mes të Kosovës dhe Shqipërisë, për të përshpejtuar proceset dhe marrëveshjet e dakorduara më parë”.
Fotografi e publikuar nga Memli Krasniqi në Facebook
Një muaj më vonë, në mars, me ftesë të Kryeministrit Rama një delagcion i LDK-së shkoi në Tiranë.
Publikun e njoftoi me takimin kryeministri Rama, i cili Abdixhikun e quajti “kryetar reformator” i LDK-së.
Kreu i LDK-së mbi albumin e fotografive të shumta nga takimi shkruante se “Takimet me Kryeministrin shqiptar janë gjithnjë të veçanta. Edhe ky i sotmi s’ishte më ndryshe”.
Ekipi i LDK-së në Tiranë, 25 mars 2022; publikuar nga Edi Rama në Facebook.
Abdixhiku kishte bërë edhe një “tur” në mjedisin e vendit të punës së Ramës, e cila shpesh është komentuar për jozakonshmërinë e një zyreje të një Kryeministri.
Nga një postim që kreu i LDK-së kishte bërë në Twitter, linte të kuptohej se gjatë takimit me Kryeministrin kanë folur edhe për futboll. Të dy janë tifozë të ekipeve rivale italiane dhe Abdixhiku po në fotografinë me Ramën po shkruante se kampion i Italisë këtë vit bëhet ekipi që ai mbështet, Milani. Rama është deklaruar tifoz i Juventusit.
Këtë vit, Scudetto megjithatë 🔴⚫️.
Kënaqësi e veçantë takimi me KM @ediramaal sot në Tiranë. pic.twitter.com/qgX6kM8fdT
— Lumir Abdixhiku (@LumirAbdixhiku) March 25, 2022
Kryeministri i Shqipërisë, së fundmi, sa herë që ka vizituar zyrtarisht Prishtinën, nuk është kthyer për andej pa shkuar në selitë e të gjitha partive kryesore që s’janë në pushtet. Prej PDK-së deri te Nisma e Fatmir Limajt.
Rama historikisht ka pasur raporte jo të këqija me opozitarët kosovarë, derisa ata janë kthyer në pushtetarë. Kështu ka ndodhur me Haradinajn, mes të cilëve përshkallëzoi situata derisa të dy ishin Kryeministra. Epilogu i përplasjeve intensive mes Ramës e Haradinajt ishte një padi e kryeministrit shqiptar ndaj tani ish-kryeministrit të Kosovës.
Edhe me Kurtin nisën përplasjet për Minishengenin, sapo të dy liderët e majtë shqiptarë, u bën homologë në krye të Qeverive.
Kur Kurti i fitoi zgjedhjet e para, dukej se akoma po e ndiqte hija e opozitarit të këndëshëm për Ramën. Takimi i parë i Kurtit si fitues në Kosovë dhe Kryeministrit shqiptar, në Tiranë, kishte zgjatur me orë të tëra. Kishin pasur një pushim mes artistësh. Këto i tregonte Rama me një status në Facebook.
“Në mes të një bashkëbisedimi të gjatë prej disa orësh me Albinin, ku hapëm shumë tema të bashkëpunimit dhe mirëkoordinimit të dy qeverive, patëm një moment pushimi të veçantë, me autorët kosovarë dhe aktorin e madh Gerard Depardieu, të cilët po xhirojnë në Shqipëri filmin “Unë dhe Millosheviçi”, shkruante Rama për takimin.
Fotografi e publikuar nga Rama në Facebook; 25 tetor, 2019
Kjo ishte një rikonfirmim se atyre vazhdon t’ju shkojë muhabeti, edhe pse viteve të fundit Rama kishte partnerin e tij kryesor në politikën kosovare, ish-Presidentin Thaçi. Me gjithë “aftësitë”, dikush zor që mund t’i kishte njësoj miq edhe Thaçin edhe Kurtin. Rama s’po e arrinte këtë dhe ishte raportuar për ftohje të raporteve mes tij dhe liderit opozitar kosovar.
Takimet e tjera, tani zyrtare mes dy kryeministrash, nuk kalonin pa shprehur qëndrimet e kundërta që Rama e Kurti i kishin, kryesisht për Minishengenin, që tani është emëruar “Open Balkan”.
Kurti e kundërshton nismën e Ramës me Serbinë, ndërsa Rama shprehet se nuk e kupton kundërshtinë e liderëve të Kosovës për një “Ballkan të Hapur”.
Në takimet e fundit mes Ramës dhe Kurtit, duket se dy Kryeministrat janë pajtuar se nuk pajtohen për “Ballkanin e Hapur” dhe nga to nuk ka dalë ndonjë përplasje që do të merrte vëmendje për përçarje mes dy liderëve.
