Kuvendi Komunal i Prishtinës më 21 dhjetor 2023 ka miratuar “rregulloren për organizimin dhe shfrytëzimin e parkingjeve të komunës së Prishtinës”, e cila bazuar në legjislacionin në fuqi duhet t’i nënshtrohet shqyrtimit të ligjshmërisë nga Ministria e Pushtetit Lokal.
Pas pranimit të kësaj rregulloreje, MAPL e ka referuar te Ministria e Drejtësisë si institucion përgjegjës për shqyrtimin e ligjshmërisë.
Veriu.info nga burime brenda MAPL ka siguruar përgjigjen e Ministrisë së Drejtësisë, ku thuhet se një nen i kësaj rregulloreje nuk është në përputhje me legjislacionin në fuqi.
“Megjithatë, Ministria e Drejtësisë, gjatë analizimit të kësaj Rregulloreje, tërheq vërejtjen se neni 22 – shkeljet brenda parkingjeve të menaxhuara nga NPL “Prishtina Parking” Sh.A., përkatësisht paragrafët: 1, 3, 8 dhe 9 të tij, duhet të rishikohen në kuptim të mbështetjes ligjore në legjislacionin në fuqi”, thuhet në përgjigjen e MD të siguruar nga Veriu.info.
Tutje, MD sqaron se NPL “Prishtina Parking” Sh.A. e ka statusin e ndërmarrjes publike lokale dhe rrjedhimisht nuk është organ mbikëqyrës i zbatimit të kësaj rregulloreje, por që këtë funksion e ka Drejtoria e Inspektimeve.
Pra, Ministria e Drejtësisë ka vlerësuar se shqiptimi i sanksioneve kundërvajtëse me gjobë, duhet të bëhet nga Drejtoria e Inspektimeve si organ mbikëqyrës.
Me këtë rast Ministria e Drejtësisë ka rekomanduar që të ri-konsiderohet edhe njëherë me kujdes ligjshmëria e nenit 22, përkatësisht e paragrafëve 1, 3, 8 dhe 9 e këtij neni të kësaj rregulloreje.
