Robert Neçaj, vrojtues i plazhit në zonën Rana e Hedhun në Shëngjin, ishte kthyer në hero pak ditë më parë. Ai shpëtoi nga mbytja vëlla e motër me prejardhje nga Kosova.
Roberti pas problemeve me shëndetin, mori trajtim në Spitalin e Lezhës, dhe gjendja e tij është jashtë rrezikut për jetë.
Familja Neçaj nëpërmjet rrjeteve sociale ka bërë një dedikim emocionues. Babai i tij, Tonin Neçaj ka rrëfyer gjithë ngjarjen nëpërmjet një postimi në rrjetet sociale.
Tonin Neçaj sqaron se Roberti, heroi që shpëtoi vëlla e motër kosovarë, nuk ishte vrojtues në atë zonë. Megjithatë, ai kishte ndërhyrë.
“Për ata që janë kurioz sqarojmë se Roberti nuk ka qënë vrojtues në atë zonë. Ora ka qënë rreth 19:30, kur Roberti ka shkuar si zv/President i Federatës së Vrojtuesëve të plazhit për të shpërndarë mjete pune për Vrojtuesit në Shëngjin. Dy adoleshentë kosovarë 16-17 vjeç, vëlla e motër, i ka tërhequr deti kur kanë hyrë në ujë, në një vend, jashtë zonës së mbulimit nga vrojtuesit e plazhit, tek Rana e Hedhun. Djalin e kapi epilepsia (sëmundja e tokës), ndërsa vajza tmerrohet”, thuhet në rrëfimin e babait të Robertit.
May be an image of 1 person, standing and outdoors
Në këtë situatë, Robert Neçaj kishte rrezikuar edhe jetën e tij.
“Ata arrijnë aty ku deti kishte deri në 4-5 m thellësi dhe trazira dhe fillojnë të kërkojnë ndihmë. Por, si një ditë me pak reshje shiu, në orar të vonë dhe larg mundësive për ndihmë, aty afër pothuajse nuk kishte njerëz. Në këtë moment Roberti vendos të ndërhyjë për t’i ndihmuar, ndonëse e parashikonte rrezikun. Por “i mbyturi të mbyt”. I “sulmuar” nga të dy të rinjtë, për të mos u mbytur, Roberti nuk tërhiqet, por fundoset disa herë duke i mbajtur kokat e tyre jashtë ujit . Ai i mbron të rinjtë por pin shumë ujë vetë”, thotë më tutje Tonin Neçaj.
“Kur i nxjerr ata në cektësi, vetë mbetet pa ndjenja sapo mbërrin në breg. Tashmë Roberti është përmirësuar mirë dhe ndihet i lumtur për suksesin e arritur! Faleminderit me përultësi të gjithëve!”, thuhet në postimin e babait të Robert Neçaj.
Shëngjin/ Shpëton nga mbytja vëlla e motër, Roberti mbetet vet i dëmtuar – Kosova ime
Pas gjithë kësaj situate, Roberti ishte detyruar të kërkojë ndihmë mjekësore. Fatmirësisht, ai aktualisht është jashtë rrezikut për jetën.
“Faleminderit për vlerësimin që i keni bërë rastit të djalit tonë, Robertit, në sensin e humanizmit dhe dhimbjes njerëzore! Falë humanizmit dhe ndjenjës së korrektësisë në punë, Roberti u bë pre e ngjarjes së pardjeshme. Është kënaqësi e jona që ai sakrifikoi për shpëtimin e dy jetëve të dy të rinjve,vëlla e motër adoleshentë. Ndihemi shumë të lumtur që më në fund shpëtoi edhe jeta e Robertit, falë përgatitjes së tij profesionale dhe kujdesit të organeve shëndetësore të spitalit të Lezhës”, ka shkruar ai në facebook.
Në Shqipëri muajve të fundit ka pasur kritika në lidhje me mungesën e rojeve të plazhit. Së fundmi, ishte regjistruar një rast tragjik në Himarë, ku si pasojë e mjeteve lundruese ishte vrarë një vajzë e vogël.
Megjithatë, gjithashtu ka pasur raste edhe sikur ky në Shëngjin ku vrojtuesit e plazhit kanë rrezikuar veten, për të shpëtuar turistët.
Rasti në Himarë
Vdekja e 7-vjeçares në Himarë, e vrarë nga një polic që po drejtonte skafin e tij në plazhin e Potamit, kishte ngjallur shumë reagime.
Pamjet e babait që sulmoi vrasësin e më pas vendosi duart mbi kokë, gjithashtu morën dhenë, me ç’rast vërshuan kritikat ndaj shtetit shqiptar, që është nga të vetmit ku personat e pasionuar pas motorave të ujit afrohen deri te vendqëndrimi në bregdet.
I pari që reagoi ishte ish-kryeministri Sali Berisha.
Ky i fundit përmes një postimi në rrjetin social “Facebook” hodhi kritika ndaj shtetit, duke thënë se në plazhet e Shqipërisë nuk ka siguri.
“Siguria në plazhe ZERO! Për ligjin nuk pyet njeri. Krim i tmerrshëm! Skafisti, shef policie në Elbasan, A. Tase merr jetën e një fëmije 5 vjeç në det, në Himarë. I shpreh ngushëllimet më të ndjera familjes për engjëllin që humbi. Dënoj me forcën më të madhe këtë krim të tmerrshëm nga ata për të cilët ligji nuk ekziston. Dënoj gjithashtu mungësen e plotë të sigurisë në plazhet tona. Sb”, shkroi kreu opozitar.
Përveç Berishës, për rastin u deklarua edhe gazetari Blendi Fevziu.
Ai duke thënë se pa folur për rastin në veçanti duke mos pasur më tepër informacione, publikoi një video, duke thënë se kjo është një histori e paralajmëruar tash e një kohë.
“Nuk i di rrethanat e aksidentit dhe nuk merrem dot me to pa pasur me shume detaje. Por e di shume mire qe kjo eshte nje nga historite e paralajmeruar cdo dite. Qe prej me shume se 15 vitesh flas cdo sezon personalisht me Ministrat e Brendshem dhe Drejtorat e policise i trembur nga kjo barbari. Si notar dhe zhytes i perditshem jam i tmerruar nga imazhet qe shoh. Deti shqiptar eshte nje xhungel ku ligjin nuk e ben as policia, as pushteti lokal as ministria e turizmit, as marina dhe askush tjeter. E bejne bandite dhe trafikante qe pasi parkojne makinat luksoze dhe te pajustfikuara terbojne plazhet me performancen e jet skive dhe jane bere tmerri i pushuesve. E bejne femijet e biznesmeneve te papergjegjshem qe nuk e kuptojne se me parate e tyre mund t’ju blejne femijeve te mira materiale por jo te drejten per te neperkembur dinjitetin e pushuesve te tjere”, tha ndër tjerash Fevziu
