Gjatë hulumtimit për institucionet shëndetësore private që operojnë në mënyrë të kundërligjshme, me shërbime të palicencuara dhe staf ilegal (të palicencuar), kemi hasur edhe në një klinikë estetike në Prishtinë që është gjobitur nga Inspektorati Shëndetësor.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin subjekti privat shëndetësor “Estethica” Sh.P.K. me themelues Krenar Dobroshi është gjobitur me 1 mijë euro për shkelje të dispozitave të Ligjit për Shëndetësi.
Në arsyetimin e vendimit të Inspektoratit Shëndetësor të siguruar nga Veriu.info, thuhet se në “Estethica” është gjetur duke punuar kundërligjshëm infermierja Gresa Hajrizi, pasi që e njëjta nuk ka qenë e lajmëruar e as licencuar në Divizionin për Licencim dhe Akreditim të Ministrisë së Shëndetësisë.
Tutje, në vendim thuhet se gjatë inspektimit është konstatuar se institucioni privat shëndetësor “Estethica” nuk i plotëson kushtet për ofrimin e shërbimeve shëndetësore, pasi që në hapësirat e këtij institucioni gjendet edhe salloni i ondulimit, ku kryhen edhe shërbimet e manikyrit, pedikyrit dhe depilimit.
Si gjetje tjetër është konstatuar dhe pritorja e këtij institucioni privat shëndetësor, pasi që ajo ishte e përbashkët me sallonin e ondulimit.
Me rastin e këtij inspektimi në “Estethica” të Krenar Dobroshi, është evidentuar se mungojnë: defibrilatorët, EKG-ja, bombola e oksigjenit, anti-shok terapia dhe kontejnerët për mbajtjen e mjeteve medicinale.
Në fund të vendimit, ndër të tjera thuhet se “Estethica” ushtron veprimtarinë pa përmbushur kushtet nga neni 40 dhe 42 të Ligjit për Shëndetësi.
Veriu.info ka tentuar të marrë një qëndrim nga “Estethica” për këtë vendim të Inspektoratit Shëndetësor, por deri në momentin e publikimit të artikullit nuk kemi pranuar përgjigje për pyetjet e dërguara.
LEXONI EDHE:
