Sekretari i përgjithshëm i Partisë Demokratike të Kosovës (PDK), dega në Zvicër, Shaip Kadriaj, i ka reaguar kryeministrit Albin Kurti, pasi sot njoftoi se diaspora nga 1 korriku do ta marrin falas policën e sigurimit me vlefshmëri një muaj. Kadriaj tha se shprehet i zhgënjyer për këtë subvencionim.
Në një postim në Facebook, Kadriaj tha se kjo është një lëvizje për të siguruar vota nga kryeministri mashtrues Kurti, ndërsa njerëzit në Kosovë luftojnë për ta përballuar jetesën.
Ai ka pyetur Kurtin se pse nuk po e ndihmon popullin në Kosovë pasi që ka nevojë më shumë.
“Pse nuk po ndihmoni popullin që ka më shumë nevojë, z. Kurti? Prioritetet tuaja duhet të jenë në Kosovë, jo vetëm në politika populliste drejtuar kah diaspora”, ka shkruar Kadriaj.
Sekretari i përgjithshëm i PDK’së në Zvicër, në këtë shkrim i tregoi Kurtit se për çfarë kanë nevojë mërgimtarët.
“Mërgimtarët kanë nevojë për t’i krijuar kushtet për investime, jo me sanksione, me kërcënime për luftë, e me i shu mundësitë e diasporës. Bëji publik të dhënat shtetërore sa bashkatdhetarë kanë kërkuar rimbursim të policës së sigurimit për vitin e kaluar edhe aty shihet pasqyra sa kanë nevojë bashkatdhetarët për policën e sigurimit. Politikat populliste nuk po shiten ma!”, është shprehur ai.
Kryeministri i Kosovës Albin Kurti përmes një postimi në Facebook sot ka thënë se edhe këtë verë Kosova i pret bashkatdhetarët krahë hapur e me zemrën plot.
Kurit ka njoftuar se bashkatdhetarët që vijnë me vetura, nga e hëna mund të marrin falas policën e sigurimit me vlefshmëri një muaj./GazetaMetro
