I Dërguari i Posaçëm i Shteteve të Bashkuara të Amerikës për Rajonin e Ballkanit Perëndimor, Gabriel Escobar, ka përsëritur qëndrimin e Washingtonit zyrtar për çështjen e themelimit të Asociacionit të Komunave me shumicë serbe.
Në një intervistë për Zërin e Amerikës, Escobar ka thënë se Asociacioni është detyrim ligjor që duhet të zbatohet.
Sipas tij, aty përfshihet edhe zgjidhja e çështjes së transferit të dinarit në mënyrë transparente elektronike sipas ligjeve të Kosovës.
“Po, kishte dy gjëra në lidhje me të. Njëra është se Asociacioni, i cili është detyrim ligjor dhe është qëndrimi ynë se duhet të zbatohet, përfshin zgjidhjen e çështjes së transferit të dinarit në mënyrë transparente elektronike sipas ligjeve të Kosovës. Kështu që ne e mbështesim atë. Pra me fjalë të tjera, ky është një problem që do të ishte zgjidhur me Asociacionin. Tani ne kemi disa shqetësime për këtë: njëri është natyra e papritur e ndryshimit të ligjeve. Pra, institucionet e përgjegjshme nuk i befasojnë qytetarët e tyre me ndryshime administrative që do të prishin jetën e përditshme”, ka thënë Escobar.
Ai ka kritikuar ashpër vendimin e Bankës Qendrore të Kosovës për rregulloren e re për përdorimin e parave të gatshme, sipas së cilës Euroja është valuta e vetme zyrtare në Kosovë – duke përjashtuar kështu dinarin serb nga qarkullimi.
Escobar ka thënë se ka shumë problematika në zbatimin e këtij vendimi, përfshirë edhe mosofrimin e alternativave qeveritare.
“Pra, imagjinoni nëse shërbimi ynë i të ardhurave të brendshme do të vendoste një ditë se do të ndryshonte sistemin e taksave pa asnjë udhëzim dhe pa paralajmërim. Kjo do të krijonte trazira të jashtëzakonshme për bizneset amerikane. Së dyti, ata nuk kanë kontaktuar komunitetin e prekur. Pra, është një grup njerëzish që varen nga pagesat sociale nga Serbia, të cilët papritur befasohen nga kjo dhe nuk ka pasur asnjë komunikim, nuk ka pasur komunikim me ta nga Kosova. E treta është se Kosova nuk ofroi alternativa qeveritare. Me fjalë të tjera, ambasada jonë është kontaktuar nga disa persona, duke përfshirë një grua në veçanti e cila varet 100 për qind nga pagesat sociale për të rritur djalin e saj me aftësi të kufizuara, i cili nuk ka kapacitet për të udhëtuar në Serbi për të marrë para dhe ato para i duhen për të mbështetur djalin e saj, i cili nuk ka asnjë alternativë. Pra, Kosova nuk ka ofruar asnjë alternativë qeveritare. Kosova hodhi poshtë përpjekjet e Quintit, përfshirë Shtetet e Bashkuara, për të ofruar ndihmë teknike për të gjetur një mekanizëm pagese që do të ishte transparent dhe elektronik, por që nuk do të paragjykonte jetën e njerëzve që i marrin ato. Pjesa e fundit është, në samitin në Shkup, gjashtë vendet diskutuan zhvillimin e një plani pagese që do të ishte në përputhje me Bashkimin Evropian dhe do të zbatohej për të gjashtë vendet. Pra, me fjalë të tjera, gjithçka që duhej të bënin ishte të prisnin dhe do të merrnin një sistem transparent. Pra, është e vështirë të mos e shikosh këtë vendim dhe ta kritikosh”, ka thënë Escobar për VOA.
