Është shkatërruar tërësisht ura në fshatin Dobërdol të Komunës së Podujevës.
Në pamjet që kanë publikuar nga ky fshat, shihet se mbi të kanë kaluar automjete me peshë të rënda, për çka, e njëjta është në tokë.
“Ura në lagjen e Selmanajve është shembur si në pamjet në foto, do të thotë ura në këtë lagje më nuk është funksionale. Është papërgjegjësi totale e personave që kanë ngasur këto mjete pune që në një urë të vjetër e me fortësi të vogël të kalojnë me gjithë këto peshë të rënda. Kush e vuan gjithë këtë situatë, padyshim që banorët e lagjes dhe në veçanti fëmijët që sot nuk e dinë se do të shkojnë në shkollë. Lusim organet kompetente të merren me rastin në fjalë”, thuhet në postim.
Ndaj këtij rasti kanë reaguar edhe këshilltarë komunalë opozitarë në Kuvendin e Komunës së Podujevës.
“Nga banorët e fshatit Dobër jemi njoftuar që sot ura në njërën prej lagjeve të tyre është dëmtuar rëndë. Kjo urë, përveç që paralizon lagje të këtij fshati, paraqet edhe rrezik për banorët, veçmas për nxënësit. U bëjmë thirrje instancave komunale, shërbimeve publike, që të merrem me këtë çështje”, ka shkruar këshilltari i LDK-së, Qëndrim Softolli./Llapi.info
