Edhe pak ditë na ndajnë nga zgjedhjet lokale, por kryetari i Prishtinës, Përparim Rama, mbetet i ngarkuar me premtime të pambajtura. Nga 59 premtime që nuk janë realizuar ende, në qendër të vëmendjes janë ato që lidhen drejtpërdrejt me mirëqenien e qytetarëve, duke përfshirë ndërtimin e shkollave të reja në kryeqytet.
Rama kishte premtuar ndërtimin e disa shkollave në lagjet e Prishtinës, kryesisht me pak të frekuentuara nga ai. Një premtim i tillë deri tani ka mbetur kryesisht në letër.
Tre raste të veçanta kanë mbetur të parealizuara: Ndërtimi i një shkolle në lagjen “Kroi i Njelmëve”, Ndërtimi i një shkolle në lagjen “Kodra e Trimave” si dhe Ndërtimi i “Liceut Artistik”, që përfshin drejtimin e muzikës dhe baletit, artit dhe dramës, si dhe gazetarisë.
Sipas raportimeve, ndërtimi i këtyre shkollave, sipas zotimit të Ramës, pritej të përfundonte në gusht të vitit 2025, por deri tani punimet nuk kanë nisur fare.
Çfarë kishte deklaruar Rama para se të vinte në pushtet?
Para se të vinte në pushtet, Përparim Rama shprehej i bindur se brenda mandatit 4 vjeçar do të përfundonte ndërtimi i këtyre shkollave, por fjalës nuk i qëndroi prapa.
“Në programin tonë kemi projekte konkrete në relacion me arsim, shëndetësi, kulturë dhe infrastrukturë. Te programi i arsimit i kemi shtatë shkolla që janë në planin tonë. Tri shkollat e para ndërtohen brenda periudhës kohore dyvjeçare, dhe katër shkollat e tjera brenda periudhës tjetër dyvjeçare, pra brenda katër viteve i kemi shtatë shkolla të cilat do t’i ndërtojmë,” deklaronte Rama në emisionin Rubikon.
Përveç tre rasteve ku dështoi të ndërtojë shkolla të reja, Përparim Rama nuk ka mbajtur edhe 56 premtime të tjera.
Sipas të dhënave të publikuara nga Instituti GAP, gjatë katër viteve të mandatit të tij, kryetari i Prishtinës ka arritur t’i përmbushë 73 premtime, 37 janë gjysmë të përmbushura, ndërsa 37 të tjera janë vetëm të filluara.
Zgjedhjet lokale pritet të mbahen më 12 tetor. Në garë për kryetarin e Prishtinës janë: Përparim Rama nga LDK-ja, Hajrulla Çeku nga Vetëvendosje, Uran Ismaili nga Partia Demokratike e Kosovës, Bekë Berisha nga AAK dhe Besa Shahini nga PSD./Insajderi
